बर्दिया सीमा नाकाबाट ब्राउन सुगरसहित दुई युवक पक्राउ

बर्दिया  । बर्दियाको बढैयाताल गाउँपालिका–७ कण्ठपुरस्थित भारत–नेपाल सीमा नाकामा प्रहरीले लागुऔषध ब्राउन सुगरसहित दुई जनालाई पक्राउ गरेको छ।

प्रहरी चौकी कालिका बर्दियाबाट खटिएको प्रहरी टोलीले भारतबाट नेपालतर्फ पैदल आउँदै गरेका दुई जनामाथि शंका लागी चेकजाँच गरेको थियो। सो क्रममा जिल्ला बाँकेको खजुरा गाउँपालिका–७ सिमलघारीका २९ वर्षीय राजेश दर्लामी र २४ वर्षीय रमेश खनाललाई ब्राउन सुगरसहित पक्राउ गरिएको हो।

प्रहरीका अनुसार उनीहरूको साथबाट रातो प्लास्टिकमा रातो धागोले बेरेर लुकाई राखिएको ५६० मिलिग्राम (प्लास्टिकसहित) ब्राउन सुगर बरामद गरिएको हो। प्लास्टिक हटाई शुद्ध तौल गर्दा उक्त पदार्थ ४३० मिलिग्राम रहेको जनाइएको छ।

दुवै जनालाई नियन्त्रणमा लिई इलाका प्रहरी कार्यालय मैनापोखर, बर्दियामा राखेर थप अनुसन्धान भइरहेको प्रहरीले जनाएको छ।