घोराहीमा साढे १८ ग्राम ब्राउन सुगरसहित ५ जना पक्राउ, अनुसन्धान जारी

दाङ । दाङको घोराही उपमहानगरपालिका–१५ स्थित स्केट पार्क नजिक लागुऔषध (ब्राउन सुगर) को कारोबार भइरहेको भन्ने गोप्य सूचनाका आधारमा खटिएको प्रहरी टोलीले ५ जनालाई पक्राउ गरेको छ।

जिल्ला प्रहरी कार्यालय दाङका अनुसार पक्राउ पर्नेहरूमा घोराही उपमहानगरपालिका–१५ का २० वर्षीय सौरव वली, वडा नं. १३ की २८ वर्षीया सृजना चौधरी, वडा नं. ४ घर भई हाल वडा नं. १३ बस्ने २६ वर्षीय बिशाल विक, तुलसीपुर उपमहानगरपालिका–६ घर भई हाल घोराही–१३ बस्ने १८ वर्षीया यस कुमारी नेपाली र २४ वर्षीया मिना नेपाली रहेका छन्।

उनीहरूको साथबाट प्रहरीले ब्राउन सुगर जस्तो देखिने खैरो पदार्थ १८ ग्राम ६६० मिलिग्राम, सुन जस्तो देखिने पहेँलो धातु १६.२ लाल, नगद ४८ हजार ७२५ रुपैयाँ तथा ५ थान मोबाइल बरामद गरेको जिल्ला प्रहरी कार्यालय दाङले जनाएको छ।

पक्राउ परेकाहरूलाई नियन्त्रणमा लिई दाङ जिल्ला अदालत, घोराहीबाट लागुऔषध सम्बन्धी कसूरमा १० दिनको म्याद थप गरी आवश्यक अनुसन्धान कार्य अघि बढाइएको जिल्ला प्रहरी कार्यालय दाङले जानकारी दिएको छ।