प्रतापपुरमा सार्वजनिक सुनुवाई: बेलाटारी प्रहरीद्वारा शान्ति सुरक्षामा सहकार्यको आह्वान

रबिन्द्र यादव/पश्चिम नवलपरासी । इलाका प्रहरी कार्यालय बेलाटारीको आयोजनामा प्रतापपुर गाउँपालिका वडा नं. ६ को वडा कार्यालयमा नागरिक सार्वजनिक सुनुवाई कार्यक्रम सम्पन्न भएको छ। शान्ति सुरक्षा, प्रहरी सेवाको प्रभावकारिता र नागरिक-प्रहरी सम्बन्धलाई थप सुदृढ बनाउने उद्देश्यले उक्त कार्यक्रमको आयोजना गरिएको हो ।

​इलाका प्रहरी कार्यालय बेलाटारीका कार्यालय प्रमुख प्रहरी निरीक्षक शिव क्षेत्रीको अध्यक्षतामा सम्पन्न उक्त कार्यक्रममा वडा अध्यक्ष केशव प्रसाद अधिकारीको विशेष उपस्थिति रहेको थियो। कार्यक्रममा सशस्त्र प्रहरी बल बिओपी गुठी परसौनीका सशस्त्र प्रहरी निरीक्षक बद्री देवकोटाले पनि सहभागिता जनाएका थिए।।

​सार्वजनिक सुनुवाई कार्यक्रममा जनप्रतिनिधिहरु, स्थानीय बासिन्दा, सञ्चारकर्मी, व्यापारी तथा विभिन्न सरकारी एवं गैरसरकारी निकायका कर्मचारीहरूको उल्लेख्य सहभागिता रहेको थियो ।

​कार्यक्रमका अवसरमा सहभागी स्थानीयहरूले गाउँघरको सुरक्षा अवस्था, लागुऔषध नियन्त्रण र सीमा क्षेत्रमा हुने अवैध गतिविधि रोक्न प्रहरीले खेल्नुपर्ने भूमिकाका बारेमा आफ्ना जिज्ञासा र सुझावहरू राखेका थिए । सो क्रममा प्रहरी निरीक्षक शिव क्षेत्रीले नागरिकबाट प्राप्त सुझावहरूलाई आत्मसाथ गर्दै प्रहरी सेवालाई अझै पारदर्शी र जनमुखी बनाउने प्रतिबद्धता व्यक्त गरेका थिए ।

​वडा अध्यक्ष केशव प्रसाद अधिकारीले समाजमा शान्ति सुरक्षा कायम राख्न नागरिक र प्रहरीबीचको सहकार्य अपरिहार्य रहेको बताउँदै यस्ता कार्यक्रमले जनस्तरमा प्रहरीप्रतिको विश्वास बढ्ने विश्वास व्यक्त गररे ।