कपिलवस्तुमा घाइते युवकको मृत्यु प्रकरण: भ्रामक सूचना फैलाउनेमाथि कारबाहीको चेतावनी

कपिलवस्तु । कपिलवस्तुमा केही दिनअघि भएको साम्प्रदायिक झडपमा गोली लागेर घाइते भएका एक युवकको मृत्यु भएपछि सामाजिक सञ्जालमा फैलिरहेका भ्रामक सामग्रीप्रति जिल्ला प्रहरी कार्यालय कपिलवस्तुले गम्भीर ध्यानाकर्षण भएको जनाएको छ। प्रहरीले नक्कली कागजात, गलत उपचार विवरण र आधारहीन सूचना प्रसार गरेर धार्मिक द्वेष भड्काउने प्रयास भइरहेको भन्दै यस्ता गतिविधिमा संलग्नलाई कडा कानुनी कारबाही गर्ने चेतावनी दिएको हो।

कपिलवस्तुका प्रहरी नायव उपरीक्षक तथा सूचना अधिकारी रिपेन्द्र कुमार सिंहले विज्ञप्तिमार्फत सामाजिक सञ्जाल प्रयोगकर्तालाई अपुष्ट सूचना, फोटो वा भिडियो सेयर नगर्न आग्रह गरेका छन्। घटनासम्बन्धी यथार्थ जानकारीका लागि जिल्ला प्रशासन कार्यालय वा प्रहरी कार्यालयसँग सम्पर्क गर्न पनि सर्वसाधारणलाई अनुरोध गरिएको छ।

घटना चैत ७ गते महाराजगन्ज नगरपालिका–२ स्थित काली मन्दिर क्षेत्रमा भएको थियो। मन्दिरमा ढुंगामुढा र तोडफोड भएपछि हिन्दु र मुस्लिम समुदायबीच तनाव उत्पन्न भई झडपको अवस्था सिर्जना भएको थियो। दुवै पक्षबीच स्थिति बिग्रिँदै जाँदा प्रहरीले हस्तक्षेप गरेर नियन्त्रणमा ल्याउने प्रयास गरेको थियो। तर, प्रदर्शनकारीले बाटो अवरुद्ध गर्नुका साथै सुरक्षाकर्मीमाथि ढुंगा र सिसाका बोतल प्रहार गरेका थिए।

स्थिति नियन्त्रणबाहिर जान थालेपछि जिल्ला प्रशासन कार्यालयले सोही दिन दिउँसोदेखि महाराजगन्जका विभिन्न क्षेत्रमा निषेधाज्ञा लागू गरेको थियो। निषेधाज्ञा उल्लंघन गर्दै केही समूहले सुरक्षाकर्मीमाथि भाला, खुँडा लगायतका हतियार प्रयोग गरी आक्रमण गरेपछि प्रहरीले अवस्था नियन्त्रणमा लिन न्यूनतम बल प्रयोग गरेको जनाएको छ।

सोही क्रममा महाराजगन्ज–६ सानो बुटहनियाका २३ वर्षीय जितेन्द्र यादव (अरुण) घाइते भएका थिए। उनको पेट र बायाँ हातमा गोली लागेको थियो। प्रारम्भिक उपचारका लागि उनलाई भैरहवा मेडिकल कलेज लगिएको र पछि थप उपचारका लागि चितवन मेडिकल कलेज भरतपुर पठाइएको थियो।

अप्रेसनपछि केही समय स्वास्थ्यमा सुधार देखिए पनि चैत २१ गते पुनः समस्या देखिएपछि दोस्रोपटक शल्यक्रिया गरिएको थियो। उपचारकै क्रममा चैत २२ गते राति उनको मृत्यु भएको प्रहरीले पुष्टि गरेको छ।

युवकको निधनपछि घटनालाई बढाइचढाइ गरेर दुई समुदायबीच वैमनस्य फैलाउने प्रयास भइरहेको भन्दै सुरक्षा निकायले निगरानी बढाएको जनाएको छ। साथै, शान्ति सुरक्षाको अवस्था मजबुत बनाइएको र सामाजिक सद्भाव कायम राख्न सबैलाई संयमित हुन अपिल गरिएको छ।