नेपालगन्जकी सृजना बुढा मृत्यु प्रकरण: फरार दुई अभियुक्त दिल्लीमा पक्राउ, ल्याइयो बाँके

नेपालगन्ज । नेपालगन्ज उपमहानगरपालिका–१२ को कोरियनपुरमा भएको सृजना बुढा मगरको मृत्यु प्रकरणमा बाँके प्रहरीले थप दुई जना अभियुक्तलाई पक्राउ गरेको छ।

जिल्ला प्रहरी कार्यालय बाँकेका अनुसार पक्राउ पर्नेमा फरार रहेका ५० वर्षीय रहमद ढपाली र २१ वर्षीय मो आदिल ढपाली रहेका छन्। उनीहरू मृतकका प्रेमी आरिफ ढपालीका बुवा र भाइ हुन्।

बाँके प्रहरीका एक अधिकृतका अनुसार घटनापछि फरार रहेका दुवै जनालाई बाँके प्रहरी प्रमुख एसपी अंगुर जिसी अनुरोधमा भारतको नयाँ दिल्लीबाट  भारतीय प्रहरीको सहयोगमा पक्राउ गरी नेपाल ल्याइएको हो। सोमबार राति उनीहरूलाई बाँके ल्याइएको उनले बताए। उनीहरू घटना पछि नयाँ दिल्ली भाएर गएको पाइएको छ। 

यसअघि नै प्रहरीले अनुसन्धानका क्रममा संलग्नताको आशंकामा मृतक सृजनाको प्रेमी आरिफ ढपाली, उनकी आमा र दिदीसहित तीन जनालाई नियन्त्रणमा लिइसकेको छ। अब पक्राउ परेका दुई जनासहित घटनामा संलग्न पाँच जनामाथि अनुसन्धान भइरहेको जिल्ला प्रहरी कार्यालय बाँकेले जनाएको छ।

चैत १४ गते राति करिब ११:३५ बजे नेपालगन्ज–१२ को कोरियनपुरस्थित सडकमा २२ वर्षीया सृजना बुढा मगर जलेको अवस्थामा मृत फेला परेकी थिइन्।  प्रहरीले घटनाको विभिन्न कोणबाट अनुसन्धान तीव्र पारेको जनाएको छ।

प्रारम्भिक जानकारीअनुसार मृतक सृजना श्रीमानसँगको सम्बन्ध विच्छेदपछि विगत दुई वर्षदेखि आरिफ ढपालीसँग लिभिङ टुगेदरमा बस्दै आएकी थिइन्। प्रहरीले घटनाको वास्तविक कारण पत्ता लगाउन थप अनुसन्धान जारी रहेको जनाएको छ।