बँदेल ठानेर चलाइएको गोलीले किशोरको गयो ज्यान, किशोरी घाइते

दाङ । प्युठानमा अवैध शिकारका क्रममा चलाइएको गोली लागेर एक किशोरको ज्यान गएको छ भने एक किशोरी घाइते भएकी छन्।

गौमुखी गाउँपालिका–४ स्थित सुँङगुरखालको चुपाल सामुदायिक वन क्षेत्रमा बँदेल शिकार गर्ने उद्देश्यले गएको समूहले टाढाबाट जनावर ठानेर गोली प्रहार गर्दा उक्त घटना भएको प्रहरीले जनाएको छ। गोली लागेर नौबहिनी गाउँपालिका–४ का १९ वर्षीय सुशिल परियार गम्भीर घाइते भएका थिए भने उनीसँगै रहेकी १८ वर्षीया किशोरी पनि घाइते भएकी थिइन्।

घाइते दुवैलाई सुरुमा जिल्ला अस्पतालमा उपचारका लागि लगिएको थियो। पछि थप उपचारका लागि बुटवलस्थित लुम्बिनी सिटी अस्पताल पुर्‍याइएकोमा उपचारकै क्रममा परियारको मृत्यु भएको हो। किशोरीको अवस्था भने अहिले खतरा मुक्त रहेको प्रहरीले जनाएको छ।

घटनामा संलग्न २७ वर्षीय वीरेन्द्र केसीसहित चार जनालाई प्रहरीले नियन्त्रणमा लिएको छ। उनीहरू अवैध रूपमा शिकार खेल्न जंगल गएको खुलेको छ। प्रहरीले उनीहरूले लुकाएर राखेका दुई थान भरूवा बन्दुक पनि बरामद गरेको छ।

प्रहरीले पक्राउ परेका चारै जनामाथि ज्यानसम्बन्धी कसुर र हातहतियार सम्बन्धी मुद्दा चलाउने तयारी गरिरहेको छ। साथै घटनाबारे थप जानकारी सार्वजनिक गर्न जिल्ला प्रहरी कार्यालय प्युठानले पत्रकार सम्मेलन आयोजना गर्ने जनाएको छ।