भिनाजुद्वारा सालामाथि चक्कु प्रहार, सालाको मृत्यु, भिनाजु पक्राउ

काठमाडौं । सालाको हत्या आरोपमा प्रहरीले भिनाजुलाई पक्राउ गरेको छ। काठमाडौँको चन्द्रागिरी नगरपालिका–३ थानकोट खरिबोट

घरायसी विवादले उग्र रूप लिँदा ३८ वर्षीय समि अहमदले आफ्नो सालो जाकिर मन्सुरीमाथि चक्कु प्रहार गरेर हत्या गरेको प्रहरीले जानकारी दिएको छ।

शनिबार राति सवा ९ बजे महोत्तरीको गौशाला नगरपालिका–५ स्थायी घर भएर हाल थानकोटको खरिबोट बस्दै आएका जाकिर मन्सुरी र भिनाजु समि अहमदबीच पारिवारिक विवाद हुँदा समिले भान्सामा रहेको तरकारी काट्ने चक्कु सालो जाकिरमाथि प्रहार गर्दा गम्भीर घाइते भएका उनको उपचारका क्रममा मृत्यु भएको काठमाडौं प्रहरीले जनाएको छ। 

काठमाडौं प्रहरीका अनुसार गम्भीर घाइते अवस्थामा तत्काल सतुङ्गलस्थित मेड पोइन्ट अस्पताल पुर्‍याइएका जाकिरको राति साढे ९ बजे मृत्यु भएको थियो। 

घटनापछि प्रहरी टोलीले हत्या आरोपी भिनाजु  समि अहमदलाई नियन्त्रणमा लिएको छ भने घटनामा प्रयोग भएको चक्कु समेत बरामद गरिएको प्रहरीले जनाएको छ। प्रहरी वृत्त थानकोटले मृतकको शव पोस्टमार्टमका लागि महाराजगञ्जस्थित टिचिङ अस्पताल पठाइएको काठमाडौं प्रहरीले  जानकारी दिएको छ।