हातहतियार सम्बन्धी मुद्दाका ४० जना पक्राउ, २९ थान हतियार बरामद

काठमाडौं । नेपाल प्रहरीले बैशाख महिनाभरमा हातहतियार सम्बन्धी मुद्दामा संलग्न ४० जनालाई पक्राउ गरेको छ।

प्रहरीका अनुसार पक्राउ परेकामध्ये काठमाडौं उपत्यकाबाट ३ जना, कोशी प्रदेशबाट १ जना, मधेश प्रदेशबाट १ जना, बागमती प्रदेशबाट १ जना, गण्डकी प्रदेशबाट १४ जना, लुम्बिनी प्रदेशबाट ९ जना, कर्णाली प्रदेशबाट ८ जना तथा सुदूरपश्चिम प्रदेशबाट ३ जना रहेका छन्।

पक्राउ परेका व्यक्तिहरूबाट  एक थान चाइनिज पेस्तोल, एक थान पेस्तोल, एक थान रिभल्वर , २ थान कटुवा पेस्तोल,२१ थान भरुवा बन्दुक , एक थान बन्दुक १ थान तथा २ थान  एयरगन गरी जम्मा २९ थान हतियार बरामद गरिएको प्रहरीले जनाएको छ।

यसैगरी चाइनिज पेस्तोलको गोली १ राउण्ड, एसएलआरको गोली २ सय ६३ राउण्ड तथा विभिन्न बन्दुकमा प्रयोग हुने ७० राउण्ड गोली समेत बरामद भएको प्रहरीले जानकारी दिएको छ।

प्रहरीले अपराधमुक्त समाज निर्माण तथा अपराध नियन्त्रणका लागि अवैध हातहतियार कारोबारी र प्रयोगकर्तालाई कानुनी दायरामा ल्याउन विशेष अभियान सञ्चालन गरिरहेको जनाएको छ।

तस्करी, हत्या, अपहरण, डकैती, लुटपाट, जबरजस्ती चन्दा असुली तथा दुर्लभ वन्यजन्तुको शिकारमा अवैध हातहतियार प्रयोग हुने गरेको उल्लेख गर्दै प्रहरीले सूचना संकलनलाई विशेष प्राथमिकतामा राखी देशभर अभियान सञ्चालन गरिरहेको बताएको छ।

अवैध हतियार लुकाइराखेको जानकारी भएमा नजिकको प्रहरी कार्यालयमा सूचना दिन तथा अवैध हतियार बुझाउन समेत नेपाल प्रहरीले सर्वसाधारणसँग अनुरोध गरेको छ।