प्लास्टिकको बोरामा पोको पारेर खोला फालिएको महिलाको शव फेला, खुलेन पहिचान

काठमाडौं । खोलाको पुलमुनि प्लास्टिकको बोरामा पोको पारिएको अवस्थामा एक महिलाको शव फेला परेको छ।झापाको दमक नगरपालिका–१० स्थित सेतुमारी क्षेत्रमा  आज बिहान ११ बजे खोलामा बगिरहेको पानीमा सेतो प्लास्टिकको बोराभित्र राखिएको अवस्थामा अन्दाजी ३०–३२ वर्षीया महिलाको शव फेला परेको प्रहरीले जनाएको छ।

प्रहरीका अनुसार मृतकले रातो भेष्ट र जिन्सको पाइन्ट लगाएकी थिइन्। शव करिब दुईदेखि तीन दिनअघि नै पानीमा परेको हुन सक्ने अनुमान गरिएको छ। शवको अवस्था र फेला परेको परिस्थितिलाई हेर्दा घटना शंकास्पद देखिएको प्रहरीले जनाएको छ।

घटनाबारे जानकारी प्राप्त हुनासाथ इलाका प्रहरी कार्यालय दमकबाट प्रहरी नायव उपरीक्षकको कमाण्डमा अनुसन्धान टोली घटनास्थल पुगेको थियो। हाल घटनाको सूक्ष्म अनुसन्धान भइरहेको प्रहरीले जनाएको छ।

मृतकको हालसम्म पहिचान खुल्न नसकेको र सनाखतसमेत नभएको प्रहरीले जनाएको छ। मृतकलाई चिन्नुहुने अभिभावक, आफन्त, साथीभाइ वा छिमेकीहरूले नजिकको प्रहरी कार्यालय वा सम्पर्क नम्बर १००, ९८५२६७०६०९, ९८५२६९००३१ र ९८५२६९०२३२ मा जानकारी गराई अनुसन्धानमा सहयोग गरिदिन प्रहरीले अनुरोध गरेको छ।

प्रहरीका अनुसार मृतकको बाँया हातमा ट्याटु रहेको छ, जसको आधारमा समेत पहिचान खुलाउने प्रयास भइरहेको छ।