सिटी सफारीले मोटरसाइकललाई ठक्कर दिंदा प्रहरी जवानको मृत्यु

काठमाडौं । मोटरसाइकल र सिटी सफारी ठोक्किँदा एक जना प्रहरी जवानको मृत्यु भएको छ।

सुनसरीको कोशी गाउँपालिका–८ भाण्टाबारीमा गएराति भएको सवारी दुर्घटनामा प्रहरी जवान रन्दीप पौडेलको मृत्युु भएको हो। गम्भीर घाइते भएका पौडेलको उपचारका क्रममा मृत्यु भएको प्रहरीले जनाएको छ।

मृतक ३२ वर्षीय पौडेल त्रियुगा नगरपालिका–२ निवासी हुन्। उनी प्रहरी चौकी कोशी ब्यारेज मा कार्यरत थिए।

प्रहरीका अनुसार पौडेलले चलाएको स ११ प २५०० नम्बरको मोटरसाइकल र प्र १–०२–००३ ह १०५२ नम्बरको सिटी सफारी एकआपसमा ठोक्किएका थिए। दुर्घटनामा गम्भीर घाइते भएका उनलाई उपचारका लागि अस्पताल लगिएको थियो, जहाँ चिकित्सकले मृत घोषणा गरेका थिए।

घटनापछि सिटी सफारी चालक कोशी गाउँपालिका–८ निवासी ४४ वर्षीय रजाक मियाँ (पुने खान) फरार रहेका छन्। उनको खोजी कार्य जारी रहेको प्रहरीले जनाएको छ।

दुर्घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।