खहरे खोलाको बाढीले बगाउँदा दुई जनाको मृत्यु

काठमाडौं । अविरल वर्षापछि विभिन्न खहरे खोलामा आएको आकस्मिक बाढीम  बगेर दुई जनाको मृत्यु भएको  छ।

खोटाङ प्रहरीका अनुसार मृत्यु हुनेमा दिक्तेल रुपाकोट मझुवागढी नगरपालिका–६ नेर्पाकी ४३ वर्षीया शान्ता राई र केपिलासगढी गाउँपालिका–४ बाक्सिलाका ७१ वर्षीय पर्शुराम परियार रहेका छन्।

स्थानीय छाँगे खोलामा आएको बाढीले बगाउँदा शान्ता राईको मृत्यु भएको प्रहरीले जानकारी दिएको छ।  आफन्तको घरबाट फर्कने क्रममा उनी सम्पर्कविहीन भएपछि खोजी गर्दा खोलामा उनको शव फेला परेको थियो।

त्यसैगरी, बाक्सिलास्थित गाइखुरे खोल्सीमा आएको बाढीले बगाउँदा पर्शुराम परियारको ज्यान गएको जिल्ला प्रहरी कार्यालय खोटाङले जनाएको छ। खोजीका क्रममा उनको शव घटनास्थलबाट करिब १०० मिटर तल भेटिएको प्रहरीले जनाएको छ।

प्रहरीका अनुसार दुवै शवको पोस्टमार्टम प्रक्रिया पूरा गरी आफन्तलाई जिम्मा लगाउने तयारी भइरहेको छ। लगातारको वर्षासँगै नदी तथा खोलामा पानीको सतह बढेकाले उच्च सतर्कता अपनाउन स्थानीय प्रशासनले आग्रह गरेको छ।