अपराधमुक्त समाज निर्माणको अभियानमा सक्रिय भगवानपुर प्रहरी, विपद् उद्धारका लागि २४सै घण्टा 'स्ट्यान्डबाइ'

काठमाडौं  । जिल्ला प्रहरी कार्यालय बाँके प्रमुख प्रहरी उपरीक्षक (एसपी) अंगुर जिसीको निर्देशन तथा कार्ययोजनाअनुसार भारतसँग खुला सीमा जोडिएको बाँकेको नरैनापुर क्षेत्रमा अपराध नियन्त्रणलाई पहिलो प्राथमिकतामा राख्दै इलाका प्रहरी कार्यालय भगवानपुरले आफ्ना गतिविधिलाई थप प्रभावकारी बनाएको छ।

प्रहरी निरीक्षक (इन्स्पेक्टर) सुरेश कोइरालाको नेतृत्वमा रहेको इलाका प्रहरी कार्यालय भगवानपुरले अपराधमुक्त समाज निर्माणलाई प्राथमिकतामा राख्दै लागूऔषध ओसारपसार, चोरीपैठारी, सीमा अपराध तथा अन्य आपराधिक गतिविधिविरुद्ध सशक्त अभियान सञ्चालन गर्दै कारबाहीलाई तीव्र बनाएको हो।

खुला सीमाका कारण हुन सक्ने अवैध गतिविधि नियन्त्रण गर्न नियमित गस्ती, चेकजाँच, सूचना संकलन तथा बरामद अभियानलाई निरन्तर सञ्चालन गरिएको छ। सीमा क्षेत्रमा हुने अपराध नियन्त्रणका लागि भारतीय समकक्षी सशस्त्र सीमा बल (एसएसबी) सँग आवश्यक समन्वय र सूचना आदानप्रदानसमेत प्रभावकारी रूपमा भइरहेको कार्यालयले जनाएको छ। साथै, दुवै सुरक्षा निकायबीच संयुक्त (जोइन्ट) गस्तीसमेत सञ्चालन हुँदै आएको छ।

भगवानपुर प्रहरीले शान्ति सुरक्षा कायम राख्नुका साथै नागरिकको सुरक्षा सुनिश्चित गर्न प्रहरी टोलीलाई २४सै घण्टा तयारी अवस्थामा राखिएको जनाएको छ। त्यस्तै, विपद्का घटना भए तत्काल खोज तथा उद्धारमा खटिन सक्ने गरी जनशक्तिलाई 'स्ट्यान्डबाइ' अवस्थामा राखिएको छ। स्मरण रहोस्, सोही कार्यालयका प्रमुख प्रहरी निरीक्षक कोइराला विपद् व्यवस्थापन, खोज तथा उद्धारसम्बन्धी विशेष तालिमप्राप्त प्रहरी अधिकृत हुन्।

अपराध नियन्त्रणलाई मुख्य प्राथमिकतामा राखेर नरैनापुर गाउँपालिकाको ६ वटा वडाको सम्पूर्ण क्षेत्र तथा राप्तीसोनारी गाउँपालिका–६ र ७ नम्बर वडाको सुरक्षा जिम्मेवारी सम्हालिरहेको इलाका प्रहरी कार्यालय भगवानपुरले सेवाग्राहीमैत्री तथा छिटोछरितो सेवा प्रवाहमा पनि विशेष ध्यान दिएको स्थानीयवासी बताउँछन्।

स्थानीयवासीका अनुसार पछिल्लो समय प्रहरीको नियमित गस्ती, सीमा क्षेत्रमा बढाइएको निगरानी तथा जनचेतनामूलक कार्यक्रमका कारण सुरक्षा अनुभूति बढेको छ। प्रहरीसँगको समन्वय पनि सहज बन्दै गएको र समस्या पर्दा तत्काल प्रहरीको उपस्थितिसमेत हुने गरेको उनीहरूको अनुभव छ।

विशेषगरी सीमा नाका रहेको नरैनापुरलाई अपराधमुक्त बनाउने लक्ष्यका साथ लागूऔषध नियन्त्रण, चोरीपैठारी रोकथाम, सीमा अपराध न्यूनीकरण तथा समुदाय–प्रहरी साझेदारीका कार्यक्रमलाई थप प्रभावकारी बनाउँदै लगिएको देखिएको छ। स्थानीयवासीले पनि अपराध नियन्त्रणमा भगवानपुर प्रहरीको सक्रियता प्रशंसनीय रहेको बताउँदै यसलाई स्धै निरन्तरता दिनुपर्नेमा जोड दिएका छन्।