भन्सार छलीविरुद्ध सशस्त्र प्रहरीको कारबाही: १ करोड ३४ लाखबढीको अवैध सामान बरामद

काठमाडौं । सशस्त्र प्रहरीले देशभरबाट १ करोड ३४ लाख रुपैयाँभन्दा बढीको अवैध सामान बरामद गरेको छ।

सशस्त्र प्रहरी प्रधान कार्यालयका अनुसार देशका विभिन्न जिल्लामा नियमित चेकजाँच तथा खानतलासीका क्रममा मंगलबार  लत्ताकपडा, खाद्यान्न, मोटर पार्ट्स, विद्युतीय सामग्रीलगायत करिब १ करोड ३४ लाख १३ हजार रुपैयाँ बराबरका अवैध सामान बरामद गरिएको हो।

बरामद गरिएका सामानहरू आवश्यक कानुनी प्रक्रिया पूरा गरी सम्बन्धित भन्सार कार्यालयमा बुझाइएको सशस्त्र प्रहरीले जनाएको छ।

सशस्त्र प्रहरीले सीमा क्षेत्रमा हुने चोरीपैठारी तथा भन्सार छली नियन्त्रणका लागि नियमित रूपमा निगरानी र चेकजाँचलाई तीव्र बनाउँदै आएको छ। सोही अभियानअन्तर्गत विभिन्न स्थानमा गरिएको कारबाहीका क्रममा ठूलो परिमाणमा अवैध सामान बरामद भएको हो।

सशस्त्र प्रहरीले सीमा क्षेत्रमा अवैध ओसारपसार रोक्न थप प्रभावकारी रूपमा सुरक्षा निगरानी, गस्ती तथा चेकजाँचलाई निरन्तरता दिने जनाएको छ।