इन्टरपोलबाट रेड नोटिस जारी भएका फरार प्रतिवादी कतारबाट पक्राउ

काठमाडौं । मानव बेचबिखन तथा ओसारपसार र जबरजस्ती करणी मुद्दामा इन्टरपोलबाट रेड नोटिस जारी भएका एक फरार प्रतिवादीलाई कतारबाट पक्राउ गरी नेपाल ल्याइएको छ।

पक्राउ पर्नेमा धनुषाको धनौजी गाउँपालिका–५ ठेगाना भएका मो. ताहिर राईन रहेका छन्। उनलाई एनसिबी कतार दोहासँगको समन्वयमा कतारमा पक्राउ गरी सम्बन्धित मुद्दामा कानुनी कारबाही गर्ने प्रयोजनका लागि सोमबार बिहान नेपाल फिर्ता ल्याइएको नेपाल प्रहरीले जनाएको छ।

मानव बेचबिखन तथा ओसारपसार र जबरजस्ती करणी मुद्दामा संलग्न रही फरार रहेका राईनलाई अन्तर्राष्ट्रिय स्तरमा खोजतलास तथा पक्राउ गर्न एनसिबी काठमाडौंको अनुरोधमा इन्टरपोल महासचिवालयले २०८३ साउन १२ गते उनीविरुद्ध रेड नोटिस जारी गरेको थियो।

नेपाल फिर्ता ल्याइएका राईनलाई सम्बन्धित कसूरमा आवश्यक कानुनी कारबाहीका लागि जिल्ला प्रहरी कार्यालय धनुषाको जिम्मा लगाइएको नेपाल प्रहरी प्रधान कार्यालय, इन्टरपोल शाखाले जनाएको छ।