रेड कर्नर नोटिस जारी भएका फरार प्रतिवादी युएईबाट पक्राउ

काठमाडौं । वैदेशिक रोजगार ठगी मुद्दामा इन्टरपोलबाट रेड नोटिस जारी भएका फरार प्रतिवादी पक्राउ परेका छन् । पक्राउ पर्नेमा पाँचथर मिक्लाजुङ गाउँपालिका–५ घर भएका ३६ वर्षीय सुवास लावती रहेका छन् ।

नेपाल प्रहरी प्रधान कार्यालय इन्टरपोल शाखाका अनुसार एनसिबि अबुधाबी, युएईको समन्वयमा उनलाई युएईबाट पक्राउ गरी सम्बन्धित मुद्दामा कारबाहीका लागि बिहीबार नेपाल फिर्ता ल्याइएको हो ।

लावतीले सर्बिया पठाइदिने भन्दै आकर्षक तलबको प्रलोभनमा पारी पीडितबाट विभिन्न मितिमा ११ लाख ६१ हजार रुपैयाँ बैंक खातामा जम्मा गराई सम्पर्कविहीन भई ठगी गरेको आरोप छ ।

उनी फरार रहेपछि अन्तर्राष्ट्रिय स्तरमा खोजतलास तथा पक्राउका लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखाको अनुरोधमा इन्टरपोल महासचिवालयले २०८२ साउन २६ गते रेड नोटिस जारी गरेको थियो ।

पक्राउ परेका लावतीलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं बुझाइएको प्रहरीले जनाएको छ ।