जबरजस्ती करणी मुद्दाका फरार प्रतिवादीलाई इन्टरपोलले पक्राउ गरेर ल्यायो नेपाल

काठमाडौं। जबरजस्ती करणी मुद्दामा इन्टरपोलबाट रेड नोटिस जारी भएका ३२ वर्षीय फरार प्रतिवादीलैई पक्राउ गरेर नेपाल ल्याइएको छ। भोजपुर घर भएका ३२ वर्षीय जनक राई पक्राउ परेका परेका हुन्।

उनी एनसिबि कतार, दोहाको समन्वयमा कतारमा पक्राउ परेका थिए। सम्बन्धित मुद्दामा आवश्यक कानुनी कारबाहीका लागि बुधबार उनलाई नेपाल फिर्ता ल्याइएको नेपाल प्रहरीले जनाएको छ।

उक्त मुद्दामा संलग्न भई फरार रहेका राईलाई अन्तर्राष्ट्रिय स्तरमा खोजतलास तथा पक्राउ गर्न एनसिबि काठमाडौंको अनुरोधमा इन्टरपोल महासचिवालयले २०८१ चैत १९ गते रेड नोटिस जारी गरेको थियो।

नेपाल प्रहरी प्रधान कार्यालयको इन्टरपोल शाखाका अनुसार उनलाई थप कानुनी कारबाहीका लागि जिल्ला प्रहरी कार्यालय भोजपुरमा पठाइएको छ।