रेड नोटिसमा रहेका राजवंशी ओमनबाट पक्राउ, नेपाल ल्याइयो

काठमाडौँ । जबरजस्ती करणी र विद्युतीय कारोबारसम्बन्धी कसुरमा फरार रहेका झापाका एक व्यक्तिलाई प्रहरीले ओमनबाट पक्राउ गरी नेपाल ल्याएको छ।

झापा बिर्तामोड नगरपालिका–३ का बिमल राजवंशीलाई अन्तर्राष्ट्रिय प्रहरी संगठन ९इन्टरपोल० को रेड नोटिसका आधारमा ओमनमा पक्राउ गरिएको प्रहरीले जनाएको छ।

राजवंशीविरुद्ध नेपालमा अनुसन्धान तथा कानुनी कारबाही अघि बढाउनुपर्ने भएपछि नेपाल प्रहरी प्रधान कार्यालयअन्तर्गतको अपराध अनुसन्धान विभागको इन्टरपोल शाखाले अन्तर्राष्ट्रिय स्तरमा खोजी र पक्राउका लागि पहल गरेको थियो। त्यसपछि इन्टरपोल महासचिवालयले २०२६ मे १३ मा उनीविरुद्ध रेड नोटिस जारी गरेको थियो।

रेड नोटिस जारी भएपछि एनसीबी काठमाडौं र एनसीबी मस्कटबीचको समन्वयमा ओमनमा रहेका राजवंशीलाई पक्राउ गरिएको हो। पक्राउपछि नेपाल ल्याउन काठमाडौँबाट प्रहरी टोली ओमन पुगेको थियो।

प्रहरीका अनुसार राजवंशीलाई कतार एयरवेजको विमानमार्फत नेपाल ल्याइएको हो। शनिबार साँझ काठमाडौं आइपुगेपछि उनलाई प्रहरीले आफ्नो नियन्त्रणमा लिएर थप अनुसन्धान अघि बढाएको छ।

प्रहरीले राजवंशीमाथि लागेको कसुरबारे आवश्यक कानुनी प्रक्रिया अघि बढाइरहेको जनाएको छ।