हेटौंडामा स्कार्पियो दुर्घटना, उच्च अदालत वीरगञ्जका मुख्य न्यायाधीश डाँगीसहित ६ जना घाइते

हेटौंडा । मकवानपुरको भीमफेदी गाउँपालिका–६ जुरिखेतमा स्कार्पियो दुर्घटना हुँदा उच्च अदालत वीरगञ्जका मुख्य न्यायाधीश गोकर्ण डाँगीसहित ६ जना घाइते भएका छन्। घाइतेमध्ये एक महिलाको अवस्था गम्भीर रहेको प्रहरीले जनाएको छ।

मंगलबार बिहान करिब ७ बजे काठमाडौं–वीरगञ्ज सडकखण्ड हुँदै वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कार्पियो जुरिखेतमा दुर्घटनामा परेको हो। प्रहरीका अनुसार अनियन्त्रित भएको गाडी सडकबाट करिब ५० देखि ६० मिटर तल खोल्सामा खसेको थियो।

दुर्घटनामा दुई महिला र चार पुरुष घाइते भएका छन्। घाइते सबैलाई तत्काल उद्धार गरी भीमफेदी अस्पताल लगिएको मकवानपुर प्रहरीले जनाएको छ। गम्भीर घाइते महिलाबाहेक अन्य पाँच जनाको अवस्था मध्यम रहेको बताइएको छ।

गम्भीर घाइते महिलालाई थप उपचारका लागि सुविधासम्पन्न अस्पतालमा लैजाने तयारी भइरहेको प्रहरीले जनाएको छ।

घटना थाहा पाएपछि इलाका प्रहरी कार्यालय भीमफेदीबाट ट्राफिक प्रहरीसहितको टोली घटनास्थल पुगेको थियो। जिल्ला प्रहरी कार्यालय मकवानपुरबाट प्रहरी उपरीक्षक श्यामबहादुर खत्रीको नेतृत्वमा थप प्रहरी टोली पनि घटनास्थल पुगेको प्रहरीले जनाएको छ।

दुर्घटनाग्रस्त स्कार्पियो घटनास्थलमै रहेको भए पनि सडकमा यातायात सञ्चालनमा कुनै अवरोध नरहेको प्रहरीले जनाएको छ।