बसको ठक्करबाट कृषि मन्त्रालयका वरिष्ठ लेखा अधिकृतको मृत्यु

दाङ। दाङमा बसको ठक्करबाट लुम्बिनी प्रदेश सरकारका एक कर्मचारीको मृत्यु भएको छ। मृत्यु हुनेमा घोराही उपमहानगरपालिका–१३ निवासी ५० वर्षीय चेतबहादुर केसी रहेका छन्।

लुम्बिनी प्रदेशको कृषि तथा भूमि व्यवस्था मन्त्रालयमा वरिष्ठ लेखा अधिकृतका रूपमा कार्यरत केसी कार्यालयबाट घर फर्किने क्रममा दुर्घटनामा परेका हुन्।

प्रहरीका अनुसार शुक्रबार साँझ करिब ६ः३० बजे पूर्व–पश्चिम राजमार्गअन्तर्गत लमही नगरपालिका–१ स्थित सुनडबरीमा दुर्घटना भएको हो। नेपालगन्जबाट काँकडभिट्टातर्फ जाँदै गरेको लुम्बिनी प्रदेश १–०१–००१ ख ४१४८ नम्बरको बसले केसी सवार लुम्बिनी प्रदेश ०३–००१ प ८५९८ नम्बरको मोटरसाइकललाई ठक्कर दिएको थियो।

बसको ठक्करबाट गम्भीर घाइते भएका केसीलाई उपचारका लागि लमही अस्पताल लगिएको थियो। उपचारकै क्रममा उनको मृत्यु भएको प्रहरीले जनाएको छ।

मृतक केसीको शव हाल लमही अस्पतालमा राखिएको छ।