दुर्घटनामा परेका मुख्य न्यायाधीशसहित ४ घाइतेलाई हेलिकप्टरबाट काठमाडौं ल्याइयो

काठमाडौँ। मकवानपुरको भीमफेदी गाउँपालिका–६, जुरिखेतमा मंगलबार बिहान भएको सवारी दुर्घटनामा उच्च अदालत वीरगञ्जका मुख्य न्यायाधीश र रजिस्ट्रारसहित ६ जना घाइते भएका छन्।

प्रहरीका अनुसार काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको सरकारी स्कारपियो बिहान करिब ७ बजे अनियन्त्रित भई सडकबाट करिब ६० मिटर तल खोल्सामा खसेको थियो।

दुर्घटनामा उच्च अदालत वीरगञ्जका मुख्य न्यायाधीश गोकर्ण डाँगी, रजिस्ट्रार तारादत्त बडू, उनकी श्रीमती लक्ष्मी बडू, छोरा रितेन्द्र बडू, छोरी रिता बडू र चालक छुनिलाल चौधरी घाइते भएका छन्।

घाइतेहरूमध्ये लक्ष्मी बडूको अवस्था गम्भीर रहेको र अन्य पाँच जनाको अवस्था सामान्य रहेको प्रहरीले जनाएको छ। मुख्य न्यायाधीश डाँगीको टाउको र शरीरका विभिन्न भागमा चोट लागेको छ भने अन्य घाइतेहरूको पनि टाउको तथा शरीरका अन्य अङ्गमा चोट लागेको छ।

घटनाको जानकारी प्राप्त हुनासाथ इलाका प्रहरी कार्यालय भीमफेदी र जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्रीसहितको टोली घटनास्थलमा पुगी उद्धार कार्य गरेको थियो। घाइतेहरूको प्रारम्भिक उपचार भीमफेदी अस्पतालमा गरिएको थियो।

थप उपचारका लागि चालक छुनिलाल चौधरी र रजिस्ट्रार तारादत्त बडूलाई हेटौंडा अस्पताल पठाइएको छ भने गम्भीर घाइते लक्ष्मी बडूसहित मुख्य न्यायाधीश गोकर्ण डाँगी र अन्य दुई जना गरी चार जनालाई नेपाली सेनाको हेलिकप्टरमार्फत काठमाडौंस्थित श्री वीरेन्द्र अस्पताल, छाउनी ल्याइएको छ।

दुर्घटनाग्रस्त सवारीसाधन घटनास्थलमै रहेको र हाल सडकमा यातायात सञ्चालन सुचारु रहेको छ। दुर्घटनाको कारण खुल्न सकेको छैन र यस विषयमा थप अनुसन्धान भइरहेको प्रहरीले जनाएको छ।