गाडीको ठक्करबाट गम्भीर घाइते भएका रास्वपा कपुरकोटका सभापति वलीको मृत्यु

सल्यान । सवारी दुर्घटनामा गम्भीर  घाइते भएका राष्ट्रिय स्वतन्त्र पार्टी (रास्वप( सल्यान कपुरकोटका सभापति बेदबहादुर वलीको उपचारका क्रममा मृत्यु भएको छ।

कपुरकोट गाउँपालिका–६ का ३४ वर्षीय वलीको दाङको घोराहीस्थित सञ्जिवनी टिचिङ हस्पिटलमा  आज बिहान करिब ८ बजे उपचारका क्रममा मृत्यु भएको प्रहरीले जनाएको छ।

मंगलबार बिहान पौने १२ बजेतिर राप्ती राजमार्गअन्तर्गत कपुरकोट गाउँपालिका–३ मूलपानी नजिकै वली दुर्घटनामा परेका थिए।। बाँकेको नेपालगञ्जबाट दाङको तुलसीपुर हुँदै रुकुम पश्चिमतर्फ जाँदै गरेको लु-प्र-०१–००१ ख १११२ नम्बरको फोर्स गाडीले विपरीत दिशाबाट कपुरकोटतर्फ आउँदै गरेको बा ६८ प २५२८ नम्बरको मोटरसाइकललाई ठक्कर दिएको थियो।

मोटरसाइकल वलीले चलाएका थिए भने उनका काका ५२ वर्षीय शुकलाल वली पछाडि सवार थिए। दुर्घटनामा दुवै जना घाइते भएका थिए। उनीहरूलाई उद्धार गरी कपुरकोटस्थित आधारभूत अस्पतालमा प्रारम्भिक उपचारपछि थप उपचारका लागि दाङ पठाइएको थियो।

वलीको तुलसीपुरस्थित राप्ती लाइभ केयर हस्पिटलमा उपचार गरिएको थियो। त्यहाँका चिकित्सकले थप उपचारका लागि घोराही रेफर गरेपछि सञ्जिवनी हस्पिटलमा उपचार भइरहेको अवस्थामा उनको मृत्यु भएको प्रहरीले जनाएको छ।

दुर्घटनामा घाइते शुकलाल वलीको भने बाँकेको नेपालगञ्जमा उपचार भइरहेको कपुरकोट गाउँपालिका–६ का वडाध्यक्ष श्यामकृष्ण बोहराले जानकारी दिए।

सल्यानका प्रहरी प्रमुख डीएसपी दीपक पातलीका अनुसार दुर्घटनामा संलग्न फोर्स गाडीका चालक दाङको तुलसीपुर उपमहानगरपालिका–११ निवासी २७ वर्षीय सुरज मिजार प्रहरी नियन्त्रणमा छन्। घटनाबारे थप अनुसन्धान भइरहेको प्रहरीले जनाएको छ।