दुई दिनदेखि हराएका साढे दुई वर्षीय बालकको सकुशल उद्धार

नवलपुर — गैँडाकोट नगरपालिका–१४, भागरबाट दुई दिनदेखि हराइरहेका साढे दुई वर्षीय बालक शिवान तामाङलाई सामुदायिक वनबाट सकुशल उद्धार गरिएको छ।

भदौ २ गते बिहान करिब ७ बजे भागर निवासी हेमकुमारी आले घरनजिकै रहेको शंखदेवी सामुदायिक वनमा च्याउ टिप्न गएकी थिइन्। उनी घर फर्किएपछि उनका नाति शिवान घरमा नभएको पाइएको थियो।

बालक हराएपछि स्थानीय बासिन्दा तथा छरछिमेकीले आसपासका वन क्षेत्रमा खोजतलास गरे पनि फेला पार्न नसकेपछि इलाका प्रहरी कार्यालयमा जानकारी गराइएको थियो।

बालकको खोजीका लागि स्थानीय बासिन्दासहित इलाका प्रहरी कार्यालय गैँडाकोट, इलाका प्रहरी कार्यालय रजहर तथा अस्थायी प्रहरी पोस्ट बेल्डियाबाट प्रहरी टोली परिचालन गरिएको थियो।

खोजतलासका क्रममा भदौ ४ गते बिहान करिब १० बजे शिवानलाई गैँडाकोट नगरपालिका–१४ स्थित शंखदेवी सामुदायिक वनअन्तर्गत भागर खोलाको सिरानमा फेला पारिएको हो।

बालकलाई सकुशल उद्धार गरी आवश्यक प्रक्रिया पूरा गरेपछि सम्बन्धित आफन्तको जिम्मा लगाइएको प्रहरीले जनाएको छ।