रसुवा बाढी: ८ बैंकका २६ कर्मचारी सम्पर्कविहीन

रसुवा । बुधबार बिहान रसुवामा आएको भीषण बाढीका कारण ८ वटा बैंकका २६ जना कर्मचारी सम्पर्कविहीन भएका छन्।

नेपाल बैंकर्स संघका अनुसार प्रभु बैंक, हिमालयन बैंक, ग्लोबल आइएमई बैंक, सानिमा बैंक, नेपाल इन्भेस्टमेन्ट मेगा बैंक, लक्ष्मी सनराइज बैंक, एनएमबी बैंक र माछापुच्छ्रे बैंकका कर्मचारी सम्पर्कविहीन अवस्थामा रहेका हुन्।

भोटेकोसी नदीमा आएको बाढीका कारण टिमुरे, स्याफ्रुबेँसी र बेत्रावती बजारमा रहेका ती बैंकका शाखाहरूमा समेत क्षति पुगेको तथा केही शाखा बाढीले बगाएको बुझिएको संघले जनाएको छ।

बाढीका कारण बैंकका शाखा तथा कर्मचारीको अवस्थाबारे विस्तृत विवरण अझै प्राप्त हुन बाँकी रहेको नेपाल बैंकर्स संघले जनाएको छ। सम्पर्कविहीन कर्मचारीको खोजी तथा अवस्थाबारे थप विवरण संकलन भइरहेको छ।