थाइल्यान्डबाट हुलाकमा गाँजा मगाउने दुई युवती पक्राउ, लिन आएका दुई भारतीय पनि समातिए

काठमाडौँ । थाइल्यान्डबाट हुलाकमार्फत नेपाल ल्याइएको गाँजा कारोबारमा संलग्न रहेको आरोपमा प्रहरीले चार जनालाई पक्राउ गरेको छ। पक्राउ पर्नेमा दुई नेपाली युवती र दुई भारतीय नागरिक रहेका छन्।

लागुऔषध नियन्त्रण ब्युरोका अनुसार भदौ ९ गते डिल्लीबजारस्थित गोश्वारा हुलाक कार्यालयबाट इटहरी पठाउन लागिएको एउटा पार्सलमाथि शङ्का लागेपछि प्रहरीले जाँच गरेको थियो। जाँचका क्रममा उक्त पार्सलबाट ९१० ग्राम थाइल्यान्डबाट ल्याइएको गाँजा फेला परेको थियो।

पार्सल नियन्त्रणमा लिएपछि प्रहरीले त्यसलाई ‘कन्ट्रोल डेलिभरी’मार्फत इटहरी पठाएको थियो। पार्सल बुझ्न आएका दुई युवतीलाई प्रहरीले पक्राउ गरेको ब्युरोका एसएसपी सुवास बोहराले बताए।

पक्राउ पर्नेमा धरान उपमहानगरपालिका–१५ मिलनपथमा बस्दै आएकी १९ वर्षीया जेसिका तामाङ र सोही स्थानमा बस्ने धनकुटाको छथर जोरपाटी घर भएकी २५ वर्षीया तारा मगर छन्। उनीहरू बस्दै आएको डेरामा समेत प्रहरीले तलासी लिँदा थप एक किलो थाइल्यान्डको गाँजा बरामद गरेको जनाएको छ।

गाँजा लिन भारतबाट आएका दुई जनालाई पनि प्रहरीले पक्राउ गरेको छ। लागुऔषध नियन्त्रण ब्युरोको शाखा कार्यालय विराटनगर तथा इलाका प्रहरी कार्यालय धरानबाट खटिएको टोलीले उनीहरूलाई पक्राउ गरेको हो।

पक्राउ पर्ने भारतीय नागरिकमा केरलाका २४ वर्षीय सारोन सुनिल तिया र २२ वर्षीय अमल आर रहेका छन्। पक्राउ परेका चारै जनामाथि इलाका प्रहरी कार्यालय धरानबाट थप अनुसन्धान भइरहेको प्रहरीले जनाएको छ।