गुडिरहेको ईभी कारमा अचानक आगलागी हुँदा एक पुरुषको मृत्यु

काठमाडौं । सडकमा गुडिरहेको कारमा अचानक आगलागी हुँदा एक जनाको मृत्यु भएको छ। प्रहरी प्रधान कार्यालयका अनुसार आज बिहान ६ बजे चितवनको भरतपुर महानगरपालिका(९ बसन्तचोकमा कारमा आगलागी भएको थियो।

पूर्व–पश्चिम राजमार्गको सर्भिस लेनमा पूर्वबाट पश्चिमतर्फ आउँदै गरेको बा-प्र- ०१–०३० च ५५७९ नम्बरको ईभी कारमा अचानक आगलागी भएको प्रहरीले जनाएको छ।

आगलागी भएको सूचना प्राप्त हुनासाथ प्रहरी टोली घटनास्थलमा पुगेको थियो। दमकलको सहयोगमा आगो नियन्त्रणमा लिएपछि कारभित्र एक जना पुरुष जलेको अवस्थामा मृत फेला परेको प्रहरीले जनाएको छ।

मृतकको नाम, थर र ठेगाना हालसम्म खुल्न सकेको छैन। आगलागीबाट कारसमेत जलेर क्षति भएको छ भने  मृतकको पहिचान तथा आगलागीको कारणबारे थप अनुसन्धान भइरहेको प्रहरी प्रधान कार्यालयले जनाएको छ।