जेलबाट भागेका दुर्गालाल आखिर एक वर्षपछि पक्राउ

दाङ । प्रहरीले जेनजी आन्दोलनको गलत फाइदा उठाउँदै कारागारबाट भागेका एक जना कैदीलाई एक वर्षपछि पुनः पक्राउ गरेको छ। रुकुम पश्चिमको बाँफिकोट गाउँपालिका–२, जितुका २६ वर्षीय दुर्गालाल परियार भनिने दुर्गालाल दमाई जेल तोडेर भागेको एक वर्षपछि पुनः पक्राउ परेका हुन्।

गएराति ९ बजेतिर उनलाई घरबाटै नियन्त्रणमा लिइएको जिल्ला प्रहरी कार्यालयका प्रवक्ता प्रहरी निरीक्षक हेमन्त गिरीले बताए।

जबरजस्ती करणी मुद्दामा जिल्ला अदालतले २०८१ माघ ६ गते दमाईलाई १२ वर्ष कैद, ५ लाख रुपैयाँ जरिवाना र ५० हजार रुपैयाँ क्षतिपूर्ति भराउने फैसला सुनाएको थियो।

जिल्ला कारागारमा तोकिएको सजाय भुक्तान गरिरहेका बेला जेनजी आन्दोलनको गलत फाइदा उठाउँदै कारागारको गेट तोडेर दमाई फरार भएका थिए।

पक्राउपछि शुक्रबार दमाईलाई अदालतमा पेस गरिएको थियो। अदालतको आदेशले फेरि उनलाई तोकिएको बाँकी सजाय भुक्तान गर्नका लागि कारागार चलान गरिएको प्रहरीले जनाएको छ।