पहुँचको दुरुपयोग गर्दै हिरासतबाट थुनुवा छुटाइदिने भन्दै एक लाख असुली, एक जना पक्राउ

काठमाडौं । प्रहरीको नाम र पहुँचको दुरुपयोग गर्दै थुनुवालाई छुटाइदिने भन्दै एक लाख रुपैयाँ असुली गरेको आरोपमा एक जना पक्राउ परेका छन्।

रौतहटको गरुडा नगरपालिका–९ श्रीपुरमा केही दिनअघि भएको झगडाका क्रममा प्रहरीमाथि दुर्व्यवहार गरेको आरोपमा रामजन मियाँ पक्राउ परेका थिए। 

त्यसपछि उनलाई छुटाइदिने भन्दै रामजनकी श्रीमतीसँग एक लाख रुपैयाँ लिएको आरोपमा प्रहरीले एक जनालाई पक्राउ गरेको हो पक्राउ पर्नेमा गरुडा नगरपालिका–९ श्रीपुरका शेख हुस्नैन रहेका छन्। उनलाई ठगी कसुरमा पक्राउ गरी प्रहरीले अनुसन्धान अघि बढाएको हो।

प्रहरीका अनुसार हुस्नैनले रामजनकी श्रीमतीसँग प्रहरीसँग कुरा गरेर मुद्दा मिलाइदिने र थुनुवालाई छुटाइदिने आश्वासन दिएका थिए। सोही आश्वासनमा रकम लिए पनि रामजन नछुटेपछि उनकी श्रीमतीले आफू ठगीमा परेको भन्दै इलाका प्रहरी कार्यालय गरुडामा जाहेरी दिएकी थिइन्।

जाहेरीका आधारमा पक्राउ परेका हुस्नैनलाई जिल्ला अदालत गौरबाट म्याद लिएर थप अनुसन्धान भइरहेको इलाका प्रहरी कार्यालय गरुडाका प्रमुख प्रहरी नायब उपरीक्षक शंकरप्रसाद आचार्यले बताए।

उनका अनुसार प्रहरीको नाममा रकम असुली गर्ने कार्य गम्भीर विषय भएकाले घटनाबारे अनुसन्धान भइरहेको छ।

यसै घटनामा गरुडा–९ का वर्तमान वडाध्यक्ष राजेश सहनीविरुद्ध पनि थुनुवा छुटाइदिने भन्दै रकम असुली गरेको आरोपमा जाहेरी परेको छ। सहनीमाथि लागेको आरोपबारे समेत अनुसन्धान भइरहेको प्रहरीले जनाएको छ।

सहनीले भने आफूले रामजनलाई छुटाउन कसैसँग रकम नलिएको भन्दै आरोप अस्वीकार गरेका छन्। पक्राउ परेका शेख हुस्नैन गरुडा नगरपालिका–९ का वडाध्यक्ष पदका प्रत्याशी हुन्।  उनी हाल इलाका प्रहरी कार्यालय गरुडाको नियन्त्रणमा छन्। घटनामा अन्य व्यक्तिको संलग्नताबारे समेत अनुसन्धान भइरहेको प्रहरीले जनाएको छ।