८ करोड ४२ लाख बिगो भएका १२ बैंकिङ कसुर मुद्दाका फरार प्रतिवादी शेरबहादुर पक्राउ

काठमाडौं । विभिन्न १२ वटा बैंकिङ कसुरसम्बन्धी मुद्दामा अदालतबाट कैद र जरिवाना ठहर भई फरार रहेका एक जना प्रतिवादीलाई प्रहरीले पक्राउ गरेको छ ।

पक्राउ पर्नेमा ओखलढुंगाको चम्पादेवी गाउँपालिका–३ घर भई हाल काठमाडौं महानगरपालिका–३२ बस्दै आएका ४८ वर्षीय शेरबहादुर मगर रहेको काठमाडौं उपत्यका अपराध अनुसन्धान कार्यालय काठमाडौंले जनाएको छ।

अपराध अनुसन्धान कार्यालयका अनुसार राजु खड्कासमेतले दिएको जाहेरीमा शेरबहादुर  प्रतिवादी रहेको १२ वटा बैंकिङ कसुरसम्बन्धी मुद्दामा उच्च अदालत पाटन, काठमाडौं जिल्ला अदालत र भक्तपुर जिल्ला अदालतबाट भएका विभिन्न फैसलाअनुसार उनलाई २ वर्ष १४ दिन कैद र ६२ लाख १० हजार १०० रुपैयाँ जरिवाना हुने ठहर भएको थियो ।

फैसला कार्यान्वयनका लागि फरार रहेका मगरलाई प्रहरीले खोजतलास गर्ने क्रममा ललितपुर महानगरपालिका–१० बाट अपराध अनुसन्धान कार्यालयको टोलीले पक्राउ गरेको हो ।

पक्राउ परेका शेरबहादुरलाई फैसला कार्यान्वयनका लागि काठमाडौं जिल्ला अदालत, बबरमहलमा उपस्थित गराइएको अपराध अनुसन्धान कार्यालयले जनाएको छ ।

अपराध अनुसन्धान कार्यालयका अनुसार शेरबहादुरविरुद्ध विभिन्न प्रहरी कार्यालयमा दर्ता भएका बैंकिङ कसुर तथा चेक अनादरसम्बन्धी मुद्दामा गरी ८ करोड ४२ लाख ३६ हजार रुपैयाँ बिगो कायम रहेको विवरण खुलेको छ ।

उनीविरुद्ध जिल्ला प्रहरी परिसर काठमाडौं, ललितपुर तथा प्रहरी वृत्त नयाँ बानेश्वर र महाराजगञ्जलगायतका कार्यालयमा विभिन्न मुद्दा दर्ता रहेको र तीमध्ये अधिकांशमा उनी फरार रहेको पाइएको अपराध अनुसन्धान कार्यालयले जनाएको छ।