सुरक्षा जोखिम देखिएपछि पूर्वप्रधानन्यायाधीश जबरा सुरक्षित स्थानमा सारिए

काठमाडौं । पूर्वप्रधानन्यायाधीश चोलेन्द्र शमशेर जबरालाई प्रहरीले सुरक्षित स्थानमा सारेको जनाएको छ। महाराजगञ्जस्थित निवासबाट नियन्त्रणमा लिएको करिब १० घण्टापछि उनलाई अर्को स्थानमा लगिएको हो।

प्रहरीले आइतबार बिहान करिब ३ बजे जबरालाई निवासबाटै नियन्त्रणमा लिएर टेकुस्थित काठमाडौं उपत्यका अपराध अनुसन्धान कार्यालय पुर्‍याएको थियो। केही समय कार्यालयमा राखेपछि उनलाई त्यहाँबाट अन्यत्र सारिएको हो।

उपत्यका अपराध अनुसन्धान कार्यालयका एसएसपी सन्तोष खड्काका अनुसार जबरालाई उनले उपयुक्त ठानेको स्थानमा लगिएको हो। उनका अनुसार जबराको सुरक्षामा समेत थप व्यवस्था गरिएको छ।

तर, प्रहरीले उनलाई अहिले कुन स्थानमा राखिएको छ भन्नेबारे खुलाएको छैन। जबरालाई सुरक्षा जोखिम देखिएपछि नियन्त्रणमा लिइएको प्रहरीको भनाइ छ। यद्यपि, त्यस्तो सुरक्षा जोखिम वा खतरा के थियो भन्नेबारे प्रहरीले विस्तृत जानकारी दिएको छैन।