चोरी भएका १४ पावर टिलरसहित पाँच जना पक्राउ

काठमाडौं । काठमाडौं उपत्यकाबाट चोरी भएका १४ थान हाते ट्याक्टर (पावर टिलर) प्रहरीले फेला पारेको छ। चोरीका ट्याक्टर लुकाउने तथा खरिद–बिक्रीमा संलग्न रहेको आरोपमा प्रहरीले पाँच जनालाई पक्राउ गरेको हो।

प्रहरीका अनुसार उनीहरूको साथबाट बा ३१ प २१५९ नम्बरको मोटरसाइकलसमेत बरामद भएको छ। पक्राउ पर्नेमा भक्तपुरको चाँगुनारायण नगरपालिका–५ का राजु मचामसी, राजेश मचामसी र राजन मचामसी छन्।

यस्तै, भक्तपुरको बोडेमा कवाड व्यवसाय गर्दै आएका रौतहट परोहा नगरपालिका–५ का राजेश्वर जैसवाल र काभ्रेको पाँचखाल नगरपालिका–४ का विपिनकुमार शाही पनि पक्राउ परेका छन्।

स्वयम्भू क्षेत्रमा हाते ट्याक्टर चोरी भएको उजुरीपछि प्रहरीले अनुसन्धान अघि बढाएको थियो। चोरी भएका ट्याक्टरको खोजी गर्ने क्रममा असोज ८ गते मध्यपुर ठिमी नगरपालिका–९ मा उनीहरू फेला परेको प्रहरीले जनाएको छ।

प्रहरीले काठमाडौं, ललितपुर र भक्तपुरका विभिन्न स्थानबाट चोरी भएका हाते ट्याक्टर उनीहरूबाट बरामद भएको जनाएको छ।
पक्राउ परेकाहरूमाथि चोरीसम्बन्धी कसुरमा अनुसन्धान भइरहेको छ। प्रहरी वृत्त स्वयम्भूले काठमाडौं जिल्ला अदालतबाट पाँच दिनको म्याद लिएर घटनाबारे थप अनुसन्धान गरिरहेको जनाएको छ।