बाँकेमा ब्राउन सुगरसहित २ जना पक्राउ, लापसे गर्ने ५ चालक नियन्त्रणमा, लाखौंको सामान बरामद

नेपालगन्ज । बाँके प्रहरीले लागूऔषध नियन्त्रण तथा भन्सार छली तस्करीविरुद्धको कारबाहीलाई तीव्रता दिएको छ।  प्रहरीले ब्राउन सुगरसहित दुई जनालाई पक्राउ गर्नुका साथै लागू पदार्थ सेवन गरी सवारी चलाउने पाँच चालकलाई नियन्त्रणमा लिएको छ।

नेपालगन्ज उपमहानगरपालिका–१० गणेशमान चोकमा लागू पदार्थ सेवन (लापसे) चेकिङका क्रममा भे ७ प २६४७ नम्बरको मोटरसाइकल रोकेर जाँच गर्दा दैलेखको चामुण्डा बिन्द्रासैनी नगरपालिका–५ का २० वर्षीय संदेश कार्की र भैरवी गाउँपालिका–१ का १८ वर्षीय पवन विष्टको साथबाट ब्राउन सुगर ३ ग्राम ५७० मिलिग्राम  बरामद भएको बाँके प्रहरीले जनाएको छ।

उनीहरूको साथबाट विभिन्न कम्पनीका दुई थान मोबाइल र उक्त मोटरसाइकलसमेत बरामद गरिएको छ। पक्राउ परेका दुवै जनामाथि थप अनुसन्धान भइरहेको जिल्ला प्रहरी कार्यालय बाँकेले जनाएको छ।

यस्तै, गणेशमान चोकमै लुम्बिनी प्रदेश प्रहरी अस्पताल नेपालगन्ज, जिल्ला प्रहरी कार्यालय बाँके, जिल्ला ट्राफिक प्रहरी कार्यालय बाँके र लागूऔषध नियन्त्रण ब्युरो शाखा कार्यालय नेपालगन्जबाट खटिएको संयुक्त प्रहरी टोलीले ४० वटा सवारीसाधनका चालकको लागूपदार्थ सेवन परीक्षण गरेको थियो। 

परीक्षणका क्रममा पाँच जना चालकले लागू पदार्थ सेवन गरेको देखिएपछि उनीहरूलाई नियन्त्रणमा लिएर आवश्यक अनुसन्धान भइरहेको बाँके  प्रहरीले जनाएको छ।

यसैबीच, बाँके प्रहरीले भन्सार छली तस्करी गरी ल्याइएका करिब ३ लाख ८० हजार ९ सय रुपैयाँ बराबरका सामानसमेत बरामद गरेको छ। असोज १३ र १४ गते नेपालगन्ज उपमहानगरपालिका–१४ र १६ बाट लत्ताकपडा, एलईडी बल्ब, छाला तथा कपडाका जुत्ता, सुर्तीजन्य पदार्थ र माउन्टेन ड्यू नामक पेय पदार्थलगायतका सामान बरामद गरिएको हो।

बरामद सामान आवश्यक कारबाहीका लागि भन्सार कार्यालय नेपालगन्ज, बाँकेमा पठाइएको जिल्ला प्रहरी कार्यालय बाँकेले जनाएको छ।