युवतीको हातखुट्टा बाँधेर पेट्रोल छर्की आगो लगाउन खोज्ने भारतीय नागरिक पक्राउ

काठमाडौं।  युवतीको हातखुट्टा तथा घाँटी बाँधेर शरीरमा पेट्रोल छर्की आगो लगाउन खोजेको आरोपमा  भारतीय नागरिकलाई प्रहरीले  पक्राउ गरेको छ।

पक्राउ पर्नेमा भारतको किशनगञ्ज जिल्लास्थित  कदमगाछी थाना पछाड कट्टा ग्राम पञ्चायत घर भई हाल बिर्तामोड नगरपालिका–५ स्थित इलाम स्टेनमा रहेको अमृत भोग मिठाई पसलमा काम गर्दै आएका ४२ वर्षीय दिलिप चन्द्र राय रहेको प्रहरीले जनाएको छ।

प्रहरीका अनुसार असोज १२ गते राति करिब साढे १० बजे रायले मादक पदार्थ सेवन गरी बिर्तामोड–५ मा डेरामा बस्दै आएकी २२ वर्षीया रविना मगरको कोठामा प्रवेश गरेका थिए। उनले तन्ना च्यातेर मगरको हातखुट्टा तथा घाँटी बाँध्नुका साथै शरीरमा पेट्रोल छर्केर आगो लगाउन खोजेको प्रहरीले जनाएको छ।

घटनाको जानकारी पाएलगत्तै प्रहरी टोली घटनास्थलमा पुगेर रायलाई नियन्त्रणमा लिएको थियो। घटनामा घाइते मगरलाई उपचारका लागि मनमोहन अस्पताल, बिर्तामोड लगिएको छ।

पक्राउ परेका रायमाथि घटनाबारे थप अनुसन्धान भइरहेको प्रहरीले जनाएको छ।