ब्राउन सुगरसहित नेपालगन्जबाट ६ जना पक्राउ

नेपालगन्ज। बाँकेको नेपालगन्ज उपमहानगरपालिका–१९ कञ्चनपुरबाट प्रहरीले ब्राउन सुगरसहित ६ जनालाई पक्राउ गरेको छ।

प्रहरीका अनुसार कञ्चनपुरस्थित चक्रे विकको घरमा लागूऔषध कारोबार भइरहेको भन्ने सूचनाका आधारमा जिल्ला प्रहरी कार्यालय बाँकेबाट खटिएको टोलीले घरमा खानतलासी गरेको थियो। खानतलासीका क्रममा उनीहरूको साथबाट ३ ग्राम ४५० मिलिग्राम ब्राउन सुगर बरामद  भएको प्रहरीले जनाएको छ।

पक्राउ पर्नेमा नेपालगन्ज–१९ का ४४ वर्षीय घनश्याम बुढामगर, ३५ वर्षीय किरण ओली, ३२ वर्षीय चक्रे विक, २० वर्षीय वीरराम रोका मगर, बर्दियाको गुलरिया नगरपालिका–१ का ४८ वर्षीय राजेन्द्र कुमाल र कैलालीको चुरे गाउँपालिका–३ का २४ वर्षीय महेश मल्ल रहेका छन्।

प्रहरीले उनीहरूको साथबाट विभिन्न कम्पनीका पाँच थान मोबाइल र नेपाली नगद ७ हजार २३० रुपैयाँसमेत बरामद गरेको जनाएको छ।

घटनाबारे थप अनुसन्धान भइरहेको जिल्ला प्रहरी कार्यालय बाँकेले जनाएको छ।