साढे २ महिनामा १३ नाल बन्दुक बरामद , तीन जना प्रहरीको नियन्त्रणमा

कपिलवस्तु ।   पछिल्लो साढे दुई महिनामा कपिलवस्तु प्रहरीले १३ नाल बन्दुक बरामद गरेको छ। अवैध हतियारसहित तीन जनालाई पक्राउ गरिएको जिल्ला प्रहरी कार्यालय कपिलवस्तुले जनाएको छ।

जिल्ला प्रहरी कार्यालयका सूचना अधिकारी प्रहरी नायव उपरीक्षक रिपेन्द्रकुमार सिंहका अनुसार बरामदमध्ये १२ नाल घरेलु लामो बन्दुक र एक नाल छोटो बन्दुक छन्। ती हतियार साउनदेखि असोजको पहिलो सातासम्म जिल्लाका विभिन्न स्थानबाट बरामद गरिएको हो।

प्रहरीका अनुसार साउनमा तीन जनालाई पक्राउ गर्दै सात नाल घरेलु बन्दुक बरामद गरिएको थियो। त्यस्तै, भदौमा पाँच नाल र असोजको पहिलो सातामा एक नाल घरेलु बन्दुक बरामद भएको छ।

अवैध हतियारको प्रयोगबाट आपराधिक गतिविधि हुन सक्ने भन्दै प्रहरीले हतियार राख्ने तथा प्रयोग गर्ने व्यक्तिमाथि निगरानी बढाएको जनाएको छ। त्यस्ता गतिविधिमा संलग्नमाथि कानुनी कारबाहीलाई समेत तीव्रता दिइएको प्रहरीले जनाएको छ।