प्रहरीमाथि आक्रमण गर्न खोज्दा गोली चलाइयो, बालिका अपहरणका आरोपी पक्राउ

बुटवल । बालिका अपहरणको घटनामा फरार रहेका रुपन्देहीका एक अपहरणकारी आरोपीलाई प्रहरीले गोली चलाएर पक्राउ गरेको छ।

तिलोत्तमा–१७ दरखसवाका २७ वर्षीय युवराज थारु गए राति कान्छी बजारको जंगलमा फेला परेका थिए। नियन्त्रणमा लिन खोज्दा प्रहरीमाथि जाइलाग्न खोजेपछि गोली चलाइएको र उनको खुट्टामा गोली लागेको इलाका प्रहरी कार्यालय बुटवलले जनाएको छ।

थारुलाई उपचारका लागि लुम्बिनी प्रादेशिक अस्पतालमा राखिएको छ। उनीमाथि तिलोत्तमाकी १० वर्षीया बालिकालाई अपहरण गरेको आरोप छ।

प्रहरीका अनुसार बालिकालाई गत बुधबार राति घरमै सुतिरहेको अवस्थामा लगिएको थियो। बालिका हराएपछि सुरु भएको खोजीका क्रममा प्रहरीले घटनासँग जोडिएका केही महत्वपूर्ण सुराक फेला पारेको थियो।

त्यही आधारमा खोजी अघि बढाउँदा शुक्रबार साँझ कान्छी बजारको जंगलमा बालिका फेला परेकी थिइन्। अपहरण भएको करिब ३८ घण्टापछि प्रहरीले उनको सकुशल उद्धार गरेको थियो।

बालिका भेटिएपछि प्रहरीले घटनामा संलग्न व्यक्तिको खोजीलाई केन्द्रित गरेको थियो। त्यसक्रममा थारु गए राति जंगल क्षेत्रमा फेला परेका हुन्।

घटनामा उनको संलग्नता, बालिकालाई जंगलमा राख्नुको कारण तथा अपहरणको उद्देश्यबारे प्रहरीले अनुसन्धान अघि बढाएको डीएसपी निशान्त श्रीवास्तवले जानकारी दिएका छन्।