२० वर्षीया विवाहित महिलाको रहस्यमय मृत्यु, श्रीमान् प्रहरी नियन्त्रणमा

काठमाडौ।  धनुषामा एक विवाहित महिलाको रहस्यमय मृत्यु भएपछि प्रहरीले उनका श्रीमानलाई नियन्त्रणमा लिएर अनुसन्धान थालेको छ।
जनकपुरधाम उपमहानगरपालिका–१६ कपिलेश्वरकी २० वर्षीया प्रियंका दास आइतबार राति  आफ्नै घरमा मृत अवस्थामा भेटिएकी हुन्।

प्रियंका घरको सुत्ने कोठामा मृत फेला परेकी थिइन्। परिवारका अनुसार उनलाई सिलिङ पंखामा सलको पासो लगाएको अवस्थामा उनका श्रीमान् विनोदले देखेका थिए। त्यसपछि उनले पासो खोलेर प्रियंकाको शव ओछ्यानमा राखेका थिए।

घटनाको जानकारी पाएपछि कपिलेश्वर प्रहरी घटनास्थल पुगेको थियो। तर, घटनापछि स्थानीय बासिन्दाले प्रियंकाको मृत्यु शंकास्पद रहेको भन्दै रातिसम्म घरअगाडि विरोध प्रदर्शन गरेका थिए।

स्थानीयले घटनास्थलमा पत्रकारलाई प्रवेश दिनुपर्ने मागसमेत गरेका थिए। उनीहरूले प्रहरी प्रशासनविरुद्ध नाराबाजी गर्दै घटनाको निष्पक्ष अनुसन्धान गर्न माग गरेका थिए।

जिल्ला प्रहरी कार्यालय धनुषाका प्रवक्ता डीएसपी ओमप्रकाश खनालका अनुसार घटनाबारे प्रारम्भिक अनुसन्धानका लागि मृतकका श्रीमान् विनोदलाई नियन्त्रणमा राखिएको छ।

प्रहरीले घटनास्थलको मुचुल्का उठाउनेलगायतका प्रक्रिया अघि बढाएको छ। प्रियंकाको मृत्युको वास्तविक कारण भने थप अनुसन्धानपछि खुल्ने प्रहरीले जनाएको छ।