श्रीमानको हत्या गर्ने श्रीमती र श्रीमतीको हत्या गर्ने श्रीमान पक्राउ

काठमाडौं । प्रहरीले हत्या आरोपमा दुई जनालाई नियन्त्रणमा लिएको छ। प्रहरीले आफ्नै श्रीमान् र  श्रीमतीको हत्या गरेको आरोपमा छुट्टाछुट्टै स्थानबाट एक पुरुष र महिलाई पक्राउ गरेको जानकारी दिएको छ।

प्रहरीले खोटाङमा आफ्नै ५१ वर्षीय श्रीमान् पाँचकर्ण राईको हत्या गरेको अभियोगमा हलेसी तुवाचुङ नगरपालिका-९ माथिल्लो चिचिङ्गा बस्ने ५३ वर्षीया रेनुका राईलाई  पक्राउ गरेको छ । 

विवादको क्रममा रेनुकाले कोदालोको पासो प्रहार गर्दा पाँचकर्ण गम्भीर घाइते भएको भन्ने खबर प्राप्त हुनासाथ प्रहरी चौकी अर्खौलेबाट खटिएको प्रहरीले उनलाई पक्राउ गरेको हो । गम्भीर घाइते भएका पाँचकर्णको अन्नपूर्ण न्यूरो अस्पताल काठमाडौंमा थप उपचारको क्रममा मृत्यु भएको हो । 

त्यसैगरी झापामा आफ्नै  ३४ वर्षीया श्रीमती  विटी हेमरन भन्ने पूजा हेमरनको हत्या गरेको अभियोगमा कन्काई नगरपालिका-२ सुकेडागी बस्ने ३५ वर्षीय कविराज हेमरनलाई गए राति प्रहरीले पक्राउ गरेको छ । 

कविराजले खुकरी प्रहार गर्दा पूजाको घटनास्थलमै मृत्यु भएको भन्ने खबर प्राप्त हुनासाथ इलाका प्रहरी कार्यालय सुरूङ्गाबाट खटिएको प्रहरीले उनलाई पक्राउ गरेको   हो । 

प्रहरीले दुई जिल्लाका दुबै घटनामा थप अनुसन्धान गरिरहेको प्रहरी प्रधान कार्यालयले जानकारी दिएको छ ।