रेष्टुरेण्टमा यौनजन्य कार्य गराउने ३ जना पक्राउ, ५ महिलाको उद्धार

काठमाडौं । मानव बेचबिखनमा संलग्न रहेको आरोपमा प्रहरीले  ३ जनालाई पक्राउ गरेको छ ।

जिल्ला प्रहरी कार्यालय कास्कीले  पोखरा महानगरपालिका-८ सृजनाचोकस्थित मनिका रेष्टुरेण्ट संचालन गरी बस्ने मकवानपुर बकैया गाउँपालिका-४ घर भएका ४० वर्षीय पदम लुङ्बा, पोखरा महानगरपालिका-५ मालेपाटन बस्ने ५१ वर्षीय तेज नारायण तिमिल्सिना र तनहुँ व्यास नगरपालिका-५ साँगे बस्ने २१ वर्षीय सलन गुरूङलाई पक्राउ गरेको हो।

मनिका रेष्टुरेण्टमा अवैध रूपमा यौनजन्य क्रियाकलापहरू भइरहेको भन्ने सूचनाको आधारमा जिल्ला प्रहरी कार्यालय कास्कीबाट खटिएको प्रहरीले उक्त कार्यमा संलग्न उनीहरूलाई पक्राउ गरेको हो । साथै प्रहरीले उक्त रेष्टुरेण्टबाट ५ जना महिलाहरूलाई उद्धार समेत गरेको छ । 

उनीहरू उपर मानव बेचबिखन तथा ओसारपसार सम्बन्धी कसूरमा जिल्ला अदालत कास्कीबाट ६ दिन म्याद थप अनुमति लिई यस सम्बन्धमा प्रहरीले आवश्यक अनुसन्धान गरिरहेको कास्की प्रहरीले जानकारी दिएको छ।