बिग्रिएको ट्रकमा मोटरसाइकल ठोक्किँयो, २ जनाको मृत्यु,एकको अवस्था गम्भीर

काठमाडौं । बिग्रिएर रोकिराखिएको भारतीय ट्रकमा मोटरसाइकल ठोक्किँदा दुई जनाको मृत्यु भएको छ भने एक जना घाइते भएका छन् ।

पर्साको  वीरगन्ज महानगरपालिका-२२ स्थित ड्राईपोर्ट सडकखण्ड अन्तर्गत सिताराम चौकमा एचआर ५५ के ३९७१ नम्बरको भारतीय ट्रकमा बागमती प्रदेश ०३–००४ प ८६१२ नम्बरको मोटरसाइकल ठोक्किँएर दुर्घटना भएको प्रहरीले जानकारी दिएको छ।

आज बिहान ड्राईपोर्ट जाँदै गरेको उक्त मोटरसाइकल ठोक्किँएर दुर्घटना हुँदा घाइते तीनमध्ये दुई जनाको उपचारका क्रममा मृत्यु भएको प्रहरीले जनाएको छ। मृत्यु हुनेमा पर्साको छिपहरमाई गाउँपालिका-३ झलमैया टोलका रामाकान्त यादव र सोही स्थानकै विजय यादव रहेका छन् । दुर्घटनाका गम्भीर घाइते २२ वर्षीय विजय कुमार यादवको उपचार जारी छ। उनको अवस्थामा गम्भीर रहेको प्रहरीले जानकारी दिएको छ।

दुर्घटना पश्चात् ट्रक चालक फरार भएका छन्। प्रहरीले घटनाको अनुसन्धान सुरु गर्दै फरार चालकको खोजीकार्य जारी राखेको जनाएको छ।