१५ वर्ष कैद र ५ लाख जरिवाना पाएका फरार प्रतिवादी सुर्खेत प्रहरीको नियन्त्रणमा

सुर्खेत । लागुऔषध मुद्दामा १५ वर्ष कैद सजाय पाएर फरार रहेका एक प्रतिवादीलाई सुर्खेत प्रहरीले पक्राउ गरेको छ। 

उच्च अदालत तुलसीपुरबाट २०८० असार ५ गतेको फैसलामा लागुऔषध मुद्दामा दोषी ठहर भइ १५ वर्ष कैद र ५ लाख रुपैयाँ जरिवाना तोकिएका वीरेन्द्रनगर नगरपालिका-६ का ४२ वर्षीय लक्ष्मण सापकोटालाई कर्णाली प्रदेश प्रहरी कार्यालय र जिल्ला प्रहरी कार्यालय सुर्खेतको संयुक्त टोलीले आज बिहान ११ बजे पक्राउ गरेको हो।

सुर्खेत प्रहरीका अनुसार सजाय र जरिवाना पाएर लुकिछिपी बस्दै आएका सापकोटालाई वीरेन्द्रनगर-८ नगरपालिका नजिकैबाट पक्राउ गरिएको हो।

पक्राउ परेका सापकोटालाई आवश्यक सजाय भुक्तानका लागि जिल्ला अदालत सुर्खेतमा बुझाइएको जिल्ला प्रहरी कार्यालय सुर्खेतले जानकारी दिएको छ।