दार्चुलामा जीप दुर्घटना, ११ जना घाइते,चारको अवस्था गम्भीर

दार्चुला। दार्चुलामा आज बिहान एउटा जीप दुर्घटना हुँदा ११ जना घाइते भएका छन्। घाइतेमध्ये चार जनाको अवस्था गम्भीर रहेको छ।

जिल्ला प्रहरी कार्यालयका सूचना अधिकारी एवं प्रहरी निरीक्षक छत्रबहादुर रावतका अनुसार, नौगाड गाउँपालिकाको होपरीबाट होपरीगाडतर्फ जाँदै गरेको सुपप्र ०४००१ ज ०१०३ नम्बरको जीप दुर्घटनामा परेको हो।

घाइतेहरूको उद्धार गरी उपचारका लागि गोकुलेश्वर अस्पताल लगिएको छ। गम्भीर घाइते हुनेमा २५ वर्षीया पार्वती टमटा, २६ वर्षीय मोहन ठगुन्ना, १८ वर्षीया अप्सरा महता र ३५ वर्षीय उमेश ठगुन्ना रहेका छन्।

प्रहरीको प्रारम्भिक अनुमानअनुसार, चिप्लो बाटोमा ब्रेक नलागेपछि जीप दुर्घटना भएको हो। चालक लोकेन्द्रसिंह ठगुन्नासहित ११ जना सवार रहेको उक्त जीप दुर्घटनाबारे विस्तृत अनुसन्धान भइरहेको र चालकलाई नियन्त्रणमा लिइएको प्रहरी निरीक्षक रावतले जानकारी दिएका छन्।