ड्युटीमा बेहोस अवस्थामा भेटिएका प्रहरी हवल्दारको मृत्यु

काठमाडौं । सुरक्षामा खटिएका नेपाल प्रहरीका एक जना प्रहरी हवल्दारको मृत्यु भएको छ। विशेष सुरक्षा योजना अनुसार पोखरामा ड्युटीमा खटिएका प्रहरी हवल्दार ओमकुमार थापा पोखरा महानगरपालिका-१३ गौंडाकोमुखमा बेहोस अवस्थामा फेला परेका थिए।

ड्युटीमा बेहोस फेला परेका हवल्दार थापालाई पोखरास्थित स्वास्थ्य विज्ञान प्रतिष्ठान पठाइए पनि चिकित्सकहरुले मृत घोषित गरेको जिल्ला प्रहरी कार्यालय कास्कीले जानकारी दिएको छ।

कास्की प्रहरीका अनुसार नवलपुरस्थित विनय गाउँपालिका-६ शिवपुरगढी घर भएर हाल मृतक हवल्दार थापा जिल्ला अदालत समन्वय तथा सुरक्षा प्रहरी इकाई कास्की दरबन्दी भएर हाल सीआरभी भद्रकालीमा कार्यरत थिए।

हवल्दार थापा मृत्यु घटनाबारेमा प्रहरीले थप अनुसन्धान अगाडि बढाएको जिल्ला प्रहरीले कास्कीले जनाएको छ।