मोटरसाइकल चोरी गर्दैगर्दा २ र चोरीको मोटरसाइकलसहित १ जना ट्राफिक प्रहरीको नियन्त्रणमा

काठमाडौं । ट्राफिक प्रहरीले मोटरसाइकल चोरीमा संलग्न रहेको आरोपमा ३ जनालाई पक्राउ गरेको छ। उपत्यका ट्राफिक प्रहरी कार्यालयका अनुसार काठमाडौँको तारकेश्वर नगरपालिका- ४ पुरानो गुह्येश्वरीबाट चोरीको मोटरसाइकल सहित एक जनालाई ट्राफिक प्रहरीले नियन्त्रणमा लिएको हो।

ट्राफिक प्रहरीले चोरीमा संलग्न रहेको आरोपमा  ललितपुरको ललितपुर महानगरपालिका-१४ रानिबु घर भई मकवानपुरको मनहरी गाउँपालिका -७ बस्ने २० वर्षीय प्रशान्त खत्रीलाई पक्राउ गरेको जनाएको छ।

खत्रीलाई बागमती प्रदेश -०२-०४० प ०५१० नम्बरको मोटरसाइकलको नम्बर परिवर्तन गरी  बागमती प्रदेश -०२-०४२ प ६२६३ नम्बर राखेर चलाइरहेको अवस्थामा  ट्राफिक प्रहरीले नियन्त्रणमा लिएको उपत्यका ट्राफिक प्रहरी कार्यालयले जानकारी दिएको छ । उक्त मोटरसाइकल काठमाडौँको बसुन्धारा बस्ने बाराको महागढीमाई नगरपालिका-८ का मोहम्मद आमिर अंसारीले हराएको भनी खोजतलासका लागि काठमाडौँ उपत्यका ट्राफिक प्रहरी कार्यालयमा निवेदन दिएका थिए । मोटरसाइकल सहित नियन्त्रणमा आएका खत्रीलाई आवश्यक अनुसन्धानका लागि प्रहरी वृत्त महाराजगञ्ज पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीले जानकारी दिएका छन्   । 

यसैगरी काठमाडौँको कीर्तिपुर नगरपालिका- १० बाट मोटरसाइकल चोरी गर्दै गरेका २ जनालाई पनि  ट्राफिक प्रहरीले नियन्त्रणमा लिएको छ ।बागमती प्रदेश -०२-०६२ प ०६३६ नम्बरको कालो रङको मोटरसाइकल पार्किङ स्थलबाट चोरी गर्दै गरेका मकवानपुरको मनहरी गाउँपालिका-२ का २७ वर्षीय समिर रुम्बा र मकवानपुरकै हेटौडा उप-महानगरपालिका- २२ का २७ वर्षीय निमा रुम्बालाई ट्राफिक प्रहरीले नियन्त्रणमा लिएको हो ।   

मोटरसाइकलसहित नियन्त्रणमा आएका रुम्बा द्वयलाई आवश्यक अनुसन्धानका लागि प्रहरी वृत्त कीर्तिपुर पठाइएको प्रवक्ता प्रहरी उपरीक्षक सुवेदीले जानकारी दिए।