नरैनापुर शिक्षा आन्दोलन-निजी स्वार्थका नाममा गरिएको बन्द-हड्ताल तत्काल रोकियोस्: शाह

नरैनापुर । नरैनापुर गाउँपालिकाका अध्यक्ष श्तियाक अहमद शाहले शिक्षा क्षेत्रसँग जोडिएका विषयलाई लिएर पछिल्लो समय केही समूहले गरिरहेका गतिविधिप्रति गम्भीर ध्यानाकर्षण भएको बताएका छन्। गाउँपालिका अध्यक्ष शाहले आज जारी गरेको प्रेस विज्ञप्तिमार्फत बन्द–हड्ताल तथा सार्वजनिक सेवा अवरुद्ध गर्ने कार्य नगर्न सबैमा अपिल गरेका छन्।

विज्ञप्तिमा माग वा असन्तुष्टि भए कानुन हातमा नलिई संवाद, छलफल र कानुनी प्रक्रियाबाटै समाधान खोज्न सकिने उल्लेख छ। बिना पूर्वसूचना विद्यालय, स्वास्थ्य सेवा, यातायातलगायतका सेवा बन्द गर्नुले आम नागरिकलाई समस्या पर्ने भन्दै यस्तो कार्य अस्वीकार्य भएको  अध्यक्ष शाहले बताएका हुन् ।

अध्यक्ष शाहले विद्यालयमा अध्ययनरत बालबालिकालाई कक्षाबाट बाहिर निकालेर सडक जाम गर्न लगाउने  र आन्दोलनमा सहभागी गराउने कार्य गलत र निन्दनीय भएको स्पष्ट पारेका छन्। बालबालिका राष्ट्रको भविष्य भएकाले उनीहरूलाई राजनीतिक वा समूहगत स्वार्थका लागि प्रयोग गर्न नहुने विज्ञप्तिमा उल्लेख छ।

यस्ता गतिविधिले महिला, बालबालिका, वृद्धवृद्धा, श्रमिक तथा दैनिक ज्यालादारी मजदुरको दैनिक जीवन र रोजगारीमा प्रत्यक्ष असर परेको जनाइएको छ। त्यसैले शान्ति, शिक्षा र नियमित सेवा प्रवाहमा अवरोध नपुर्‍याउन सबै सरोकारवालालाई आग्रह गरिएको छ।

विज्ञप्तिमा शिक्षा सम्बन्धी विषय अदालतको आदेशअनुसार अगाडि बढिरहेको र केही व्यक्तिले भ्रम तथा गलत सूचना फैलाउने प्रयास गरिरहेकोप्रति समेत ध्यानाकर्षण गरिएको छ। यस्ता गतिविधिले समाजमा गलत सन्देश जाने भन्दै सचेत रहन अनुरोध गरिएको छ।

गाउँपालिका अध्यक्षले नरैनापुरका सम्पूर्ण नागरिकलाई शान्ति, सद्भाव, शिक्षा र विकासको पक्षमा एकजुट हुन आह्वान गर्दै समस्या समाधानका लागि संवाद र सहकार्यका लागि आफू सधैं तयार रहेको बताएका छन्।