धौलागिरीचोकका १७ वर्षीय ईशानको बीभत्स हत्या, नालीमा भेटियो शव

लुम्बिनी । रूपन्देहीमा १७ वर्षीय किशोरको बीभत्स हत्या भएको छ। जिल्लाको कञ्चन गाउँपालिका–३ धौलागिरीचोकका ईशान शर्मा पौडेलको शव बिहीबार साँझ नालीमा फेला परेको जिल्ला प्रहरी कार्यालय रूपन्देहीले जनाएको छ।

प्रहरी उपरीक्षक प्रदीप क्षेत्रीका अनुसार टाउकोमा हानेर  ईशानको हत्या गरिएको प्रारम्भिक अनुसन्धानबाट देखिएको छ। ईशान बुधबार साँझ ८ बजेदेखि बेपत्ता थिए। खोजीका क्रममा बिहीबार साँझ करिब ६ बजे स्थानीयले नालीमा शव देखेपछि प्रहरीलाई खबर गरेका थिए।

इलाका प्रहरी कार्यालय रूद्रपुरको टोलीले घटनास्थल पुगेर शव मुचुल्का गरी पोस्टमर्टमका लागि बुटवल पठाएको छ। घटनामा संलग्नको खोजी र आसपासका स्थानीयसँग सोधपुछ भइरहेको प्रहरीले जनाएको छ।

ईशान स्थानीय बुद्धदीप बोर्डिङ स्कुलमा कक्षा ११ मा अध्ययनरत थिए।