डडेल्धुरा र कञ्चनपुरमा भएका सवारी दुर्घटनामा दुई जनाको मृत्यु, दुई घाइते,एकको अवस्था गम्भीर

काठमाडौं । डडेल्धुरा र कञ्चनपुरमा भएका छुट्टाछुट्टै सवारी दुर्घटनामा दुई जनाको मृत्यु भएको छ भने दुई जना घाइते भएका छन्। घाइतेमध्ये एक जनाको अवस्था गम्भीर रहेको छ।

डडेल्धुराको रामपुर क्षेत्रमा अटो र जिप ठोक्किँदा एक जनाको मृत्यु भएको छ। गए राति करिब ८ः३० बजे आलिताल गाउँपालिका–४ जाल्टुडामा म १ च ४४१ नम्बरको जिप र विपरीत दिशाबाट आइरहेको भीनपा ००१ ह ०४०८ नम्बरको अटो एकआपसमा ठोक्किएका थिए। दुर्घटनामा परशुराम नगरपालिका–१० जोजलाका २६ वर्षीय रामबहादुर बराल मगरको मृत्यु भएको जिल्ला प्रहरी कार्यालय डडेल्धुराले जनाएको छ।

दुर्घटनामा अछामको पञ्चदेवल नगरपालिका–३ की २१ वर्षीया सविता थापामगर गम्भीर घाइते भएकी छन्। उनको अवस्था गम्भीर भएपछि जोगबुडा अस्पतालबाट थप उपचारका लागि धनगढी रेफर गरिएको जिल्ला प्रहरी कार्यालय डडेल्धुराका प्रमुख बरुणबहादुर सिंहले जानकारी दिए। अटोमा चालकसहित तीन जना सवार रहेका थिए। दुर्घटनापछि अटो चालक गोपाल मगर फरार रहेका छन् भने जिप चालकलाई प्रहरीले नियन्त्रणमा लिएको इलाका प्रहरी कार्यालय जोगबुडाले जनाएको छ। जिपमा सवार तीनै जना सकुशल रहेका छन्। घटनाबारे थप अनुसन्धान भइरहेको प्रहरीले जनाएको छ।

त्यसैगरी कञ्चनपुरमा मोटरसाइकल र ट्याक्टर ठोक्किँदा एक जनाको मृत्यु भएको छ। शुक्लाफाटा नगरपालिका–५ बनसमिति स्थित पूर्व–पश्चिम राजमार्गमा म १ त ९३१ नम्बरको ट्याक्टर र सु प प्र ०२–००४ प २६८८ नम्बरको मोटरसाइकल एकआपसमा ठोक्किँदा मोटरसाइकल चालक शुक्लाफाटा नगरपालिका–५ का ४५ वर्षीय गड्डु विक गम्भीर घाइते भएका थिए। उनलाई झलारीस्थित अस्पतालमा प्राथमिक उपचारपछि महाकाली प्रादेशिक अस्पताल लगिएकोमा उपचारकै क्रममा शुक्रबार राति ९ बजे मृत्यु भएको प्रहरीले जनाएको छ।

दुर्घटनामा मोटरसाइकलको पछाडि सवार शुक्लाफाटा नगरपालिका–५ का ४० वर्षीय विरराम पोखरेल घाइते भएका छन्। उनको झलारीमा उपचार भइरहेको छ। ट्याक्टर चालक लालझाडी गाउँपालिका–३ का २६ वर्षीय वीरेन्द्र रानालाई प्रहरीले नियन्त्रणमा लिएको छ। ट्याक्टर, मोटरसाइकल र चालक इलाका प्रहरी कार्यालय झलारीको नियन्त्रणमा रहेको प्रहरीले जनाएको छ।