४ थान बन्दुकसहित ३ जना प्रहरीको नियन्त्रणमा

स्याङ्जा । प्रहरीले ४ थान बन्दुकसहित तीन जनालाई नियन्त्रणमा लिएको छ। स्याङ्जाको विरूवा गाउँपालिका–३ सिउडीबाट प्रहरीले ४ थान भरूवा बन्दुकसहित तीन जनालाई पक्राउ गरेको जनाएको छ।

जिल्ला प्रहरी कार्यालय स्याङ्जाबाट खटिएको प्रहरी टोलीले सोही स्थानमा बसोबास गर्ने ७८ वर्षीय तिल बहादुर पुलामी, ६८ वर्षीय मिन बहादुर पुलामी र ६८ वर्षीया खिमसरा पुलामीलाई नियन्त्रणमा लिएको हो।

प्रहरीका अनुसार तिल बहादुर पुलामीको घर तलासी गर्दा २ थान, मिन बहादुर पुलामीको घरबाट १ थान र खिमसरा पुलामीको घरबाट १ थान भरूवा बन्दुक फेला परेको थियो। अवैध रूपमा राखिएका बन्दुक बरामद भएसँगै उनीहरूलाई पक्राउ गरिएको प्रहरीले जनाएको छ।

यस घटनाका सम्बन्धमा प्रहरीले आवश्यक अनुसन्धान गरिरहेको जिल्ला प्रहरी कार्यालय स्याङ्जाले जनाएको छ।