ट्राफिक प्रहरीले नियन्त्रणमा लियो १५ वटा नाइट बस,५ हजारसम्म हुन सक्छ जरिवाना

काठमाडौँ । ट्राफिक प्रहरीले १५ वटा रात्रि (नाइट बस) बसलाई नियन्त्रणमा लिएको छ। ट्राफिक प्रहरीले  अव्यवस्थित रूपमा पार्किङ गरी राखिएका १५ वटा रात्रिकालीन बसलाई नियन्त्रणमा लिएको उपत्यका ट्राफिक प्रहरी कार्यालय काठमाडौंले जानकारी दिएको छ।

उपत्यका ट्राफिक प्रहरी कार्यालयका अनुसार आज विशेष चेकजाँच अभियान सञ्चालन गरी ती बसहरू नियन्त्रणमा लिइएको हो। कार्यालयका प्रवक्ता  एसपी नरेश सुवेदीले लामो दूरीका बसहरूले तोकिएको स्थान बाहेक अन्यत्र जथाभाबी पार्किङ गर्ने र रुट परमिटमा उल्लेख गरिएको गन्तव्यभन्दा फरक दिशामा सञ्चालन हुने गुनासो बढेपछि कडाइ गरिएको बताए।

नियन्त्रणमा लिइएका सबै बसहरूलाई हाल रामशाहपथस्थित उपत्यका ट्राफिक प्रहरी कार्यालय परिसरमा राखिएको छ। सम्बन्धित बस चालकहरूलाई यातायात व्यवस्था ऐन, २०४९ को दफा ७५ अनुसार १ हजारदेखि ५ हजार रुपैयाँसम्म जरिवाना गरिने ट्राफिक प्रहरीले जनाएको छ।

एसपी सुवेदीका अनुसार उपत्यकाबाहिर सञ्चालन हुने लामो दूरीका बसहरूलाई अनिवार्य रूपमा रुट परमिटअनुसार मात्र चलाउन चालक तथा व्यवसायीलाई सचेत गराइँदै आएको छ। आगामी दिनमा पनि नियम उल्लङ्घन गर्ने सवारीसाधनमाथि निरन्तर कारबाही गरिने ट्राफिक प्रहरीले  चेतावनी दिएको छ।