ट्राफिक प्रहरीले चोरी भएका ५० वटा दुईपाङ्ग्रे सवारीसाधन फेला पार्दै बुझायो धनीलाई

काठमाडौं । काठमाडौँ उपत्यकाका विभिन्न स्थानबाट चोरी भएका ५० वटा मोटरसाइकल तथा स्कुटर प्रहरीले खोजतलास गरी सम्बन्धित धनीलाई फिर्ता गरेको छ।

काठमाडौँ उपत्यका ट्राफिक प्रहरी कार्यालयले बिहीबार एक कार्यक्रम आयोजना गरी ३० वटा मोटरसाइकल र २० वटा स्कुटर सम्बन्धित धनीलाई हस्तान्तरण गरेको हो। कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले सवारीसाधन धनीलाई ती सवारी हस्तान्तरण गरेका हुन्।

ट्राफिक प्रहरीमा परेको निवेदन तथा विभिन्न माध्यमबाट प्राप्त सूचनाका आधारमा गरिएको खोजतलासका क्रममा नेपालटार, थानकोट, बलम्बु, सातदोबाटो, नरेफाँट, मुलपानी, सिंहदरबार, काँडाघारी, नयाँ बसपार्क, टोखा, जोरपाटी, बौद्ध, कपन र गोकर्णलगायतका क्षेत्रबाट चोरी भएका सवारीसाधन फेला पारिएको प्रहरीले जनाएको छ।

फेला परेका केही सवारीमा वास्तविक नम्बर प्लेट नै प्रयोग गरिएको थियो भने केहीमा नक्कली नम्बर प्लेट राखिएको अवस्थामा प्रहरीले नियन्त्रणमा लिएको थियो।

बिहीबार हस्तान्तरण गरिएका ५० वटासहित साउन महिनामा मात्रै काठमाडौँ उपत्यका ट्राफिक प्रहरीले ८२ वटा चोरी भएका सवारीसाधन सम्बन्धित धनीलाई जिम्मा लगाइसकेको छ।  चोरीका ७ वटा दुईपाङ्ग्रे सवारीसाधनसहित चोरीमा संलग्न १४ जनालाई पक्राउ गरी आवश्यक अनुसन्धान तथा कारबाहीका लागि विभिन्न प्रहरी परिसर तथा प्रहरी वृत्तमा पठाइएको ट्राफिक प्रहरीले जनाएको छ।

हराएका सवारीसाधन फिर्ता पाएपछि धनीहरूले खुसी व्यक्त गर्दै ट्राफिक प्रहरीलाई धन्यवाद दिएका थिए।

सवारीसाधन चोरी हुन नदिन सुरक्षित स्थानमा पार्किङ गर्न, ह्यान्डल लक, डिस्क लक तथा सुरक्षा साइरन प्रयोग गर्न र सम्भव भएसम्म जीपीएस जडान गर्न प्रहरीले आग्रह गरेको छ। मानिसको आवतजावत कम हुने एकान्त स्थानमा सवारी पार्किङ नगर्न पनि ट्राफिक प्रहरीले अनुरोध गरेको छ।

सवारीसाधन हराएमा ट्राफिक प्रहरीको हटलाइन नम्बर १०३ वा नेपाल प्रहरीको हटलाइन नम्बर १०० मा सम्पर्क गर्न तथा नजिकको प्रहरी वा ट्राफिक प्रहरी कार्यालयमा निवेदन दिन सकिने प्रवक्ता प्रहरी उपरीक्षक नरेशराज सुवेदीले जानकारी दिएका छन्।