मोटरसाइकल टिपरमा ठोक्किँदा चालकसहित दुई युवकको मृत्यु

काठमाडौं । टिपरमा मोटरसाइकल ठोक्किँदा दुई युवकको मृत्यु भएको  छ।

झापाकोदमक नगरपालिका–१ बरगाछी क्षेत्रमा बुधबार दिउँसो भएको दुर्घटनामा मोटरसाइकलमा सवार दुवै जनाको मृत्यु भएको प्रहरीले जानकारी दिएको छ। दमकबाट रामचोकतर्फ जाँदै गरेको मे १ ख २८८४ नम्बरको टिपरसँग दुर्गा मन्दिरबाट पेल्टीमारीतर्फ जाँदै गरेको प्र १–०१–०१८ प ८३०३ नम्बरको मोटरसाइकल ठोक्किएको प्रहरीले जनाएको छ।

दुर्घटनामा मोटरसाइकल चालक इलामको चुलाचुली गाउँपालिका–४ निवासी २२ वर्षीय प्रवेश राई र पछाडि सवार १९ वर्षीय जनम राई गम्भीर घाइते भएका थिए। उनीहरूलाई तत्काल उद्धार गरी दमक अस्पताल पुर्‍याइए पनि चिकित्सकले अस्पताल पुग्नेबित्तिकै मृत घोषणा गरेको झापा प्रहरीका प्रवक्ता डीएसपी खगेन्द्रबहादुर खड्काले जानकारी दिएका छन् ।

घटनापछि प्रहरीले टिपर चालक उदयपुरको त्रियुगा नगरपालिका–९ रातमाटेका ३२ वर्षीय हिवराज रायलाई नियन्त्रणमा लिएको छ। दुर्घटनाबारे थप अनुसन्धान भइरहेको प्रहरीले जनाएको छ।